აშშ-ში პრემიერის ვიზიტი კიდევ ერთხელ გაუსვამს ხაზს ქართულ-ამერიკული ურთიერთობების მნიშვნელობას, ასევე ახალი შესაძლებლობების განხილვა მოხდება, – ამის შესახებ საქართველოს საგარეო საქმეთა მინისტრმა მიხეილ ჯანელიძემ ჟურნალისტებს განუცხადა, რითაც მთავრობის მეთაურის, გიორგი კვირიკაშვილის ამერიკის შეერთებულ შტატებში ვიზიტი შეაფასა.
მინისტრმა ვრცლად ისაუბრა პრემიერის ვიზიტის დღის წესრიგზეც.
”ოფიციალური ვიზიტის ფარგლებში საქართველოს პრემიერ-მინისტრი და საქართველოს დელეგაცია გამართავენ შეხვედრებს თეთრ სახლში ამერიკის შეერთებული შტატების ვიცე-პრეზიდენტ ჯოზეფ ბაიდენთან. შეხვედრები გაიმართება წარმომადგენლობით პალატასა და სენატში საგარეო ურთიერთობათა და თავდაცვის კომიტეტის თავმჯდომარეებთან,” – განაცხადა მიხეილ ჯანელიძემ.
საგარეო უწყების ხელმძღვანელის განმარტებით, პრემიერ-მინისტრი ამერიკის შეერთებული შტატების რამდენიმე ქალაქშიც გამართავს შეხვედრებს.
”პრემიერ-მინისტრი გააგრძელებს ვიზიტს ამერიკის შეერტებული შტატების სხვადასხვა ქალაქში კერძოდ ჩიკაგოში, ბოსტონსა და ნიუ-იორკში, სადაც პრემიერი თვითონ წარადგენს პირადად იმ საინვესტიციო შესაძლებლობებს, რომელიც საქართველოშია,” – აღნიშნა ჯანელიძემ.
როგორც მინისტრმა აღნიშნა, შეხვედრის ფარგლებში, საქართველოს საპარტნიორო ფონდსა და ამერიკის კერძო ინვესტიციების კორპორაციას შორის ურთიერთგაგების მემორანდუმიც გაფორმდება.
”შეხვედრის ფარგლებში ასევე იგეგმება საქართველოს საპარტნიორო ფონდსა და ამერიკის კერძო ინვესტიციების კორპორაციას შორის ურთიერთგაგების მემორანდუმის გაფორმება, რომელიც შემდგომი თანამშრომლობის ნაბიჯებს განსაზღვრავს და მნიშვნელოვანია დამატებითი ინვესტიციების მოსაზიდად ამერიკის შეერთებული შტატებიდან. ეს არის ძალიან მნიშვნელოვანი ვიზიტი, სადაც ჩვენ ძალიან კონკრეტულ ნაბიჯებს მოველით ამერიკა-საქართველოს შორის ურთიერთობების გაღრმავების კუთხით. დღეს ჩვენი თანამშრომლობა მოიცავს ძალიან ფართო სპექტრს, მაგრამ პრემიერის ვიზიტი კიდევ ერთხელ გაუსვამს ხაზს ამ ურთიერთობების მნიშვნელობას და ახალი შესაძლებლობების განხილვა მოხდება,”-განაცხადა ჯანელიძემ.
