ევროკავშირის ელჩის იანოშ ჰერმანის განცხადებით, ვიზალიბერალიზაციის საკითხის განხილვა ევროპარლამენტში, სხვადასხვა კომიტეტებში მიმდინარეობს, თუმცა როდის დასრულდება ეს პროცესი ელჩს პასუხი არ აქვს.ამის შესახებ უნგრელმა დიპლომატმა ჟურნალისტებს სასტუმრო “რედისონში” განუცხადა, სადაც ევროკავშირისა და გაერო-ს წარმომადგენლებმა საარჩევნოდ მედიამონიტორინგის დაწყების შესახებ ინფორმაცია გაავრცელეს.
“გასულ წელს, ევროკავშირმა გამოაქვეყნა ანგარიში და მასში წერია, რომ საქართველომ მიაღწია ყველა იმ მიზანს, რომელიც გათვალისწინებული იყო ევროკავშირსა და საქართველოს შორის ასოცირების შეთანხმებით. ახლა უკვე პროცესმა გადაინაცვლა ევროსაბჭოსა და ევროპარლამენტში. განხილვები მიმდინარეობს სხვადასხვა კომიტეტებში. განხილვის დონე ამაღლდება და მივა ყველაზე მაღალ საფეხურზე როგორც ევროსაბჭოში, ასევე ევროპარლამენტში. როდის დასრულდება ეს ყველაფერი, პასუხი არ მაქვს, ვიცი რომ პროცესი სწრაფად მიმდინარეობს”, – აცხადებს ჰერმანი.
შეგახსენებთ, რომ ევროკომისიამ საქართველოს მოქალაქეებისთვის უვიზო მიმოსვლის თაობაზე საკანონმდებლო ინიციატივა 9 მარტს წარადგინა.
ინიციატივაში ნათქვამია, რომ საქართველომ რეფორმების თვალსაზრისით, ვიზალიბერალიზაციის სამოქმედო გეგმით გათვალისწინებული ყველა ამოცანა შეასრულა და ამიტომ, აკმაყოფილებს ყველა შესაბამის კრიტერიუმს, რათა მისი მოქალაქეები სავიზო მოთხოვნებისგან განთავისუფლდნენ“.
საკანონმდებლო ინიციატივა ძალაში შესვლამდე ევროპარლამენტმა და ევროკავშირის წევრმა სახელმწიფოებმა უნდა დაამტკიცონ.
