„საპატიმრო და პოლიციის დაწესებულებებში მიყვანილი ადამიანების უმრავლესობა, თითქმის 80%-ზე მეტი დაექვემდებარა წამებას და არაადამიანურ მოპყრობას. ეს არ არის „ქართული ოცნების“ პოლიტიკური გუნდის შეფასება, ეს დაადგინა სასამართლომ. 81 ყოფილი თანამდებობის პირი სამამართლომ უკვე დამნაშავედ სცნო.“ ძალადობრივი დანაშაულების შესახებ გამოქვეყნებული შემაჯამებელი ანგარიშის შესახებ პარლამენტის ადამიანის უფლებათა დაცვის კომიტეტის თავმჯდომარე ეკა ბესელიამ „GDS“-ზე, გადაცემა „2030“-ის ეთერში ისაუბრა.
„ეს არის 2004-2012 წლებში ძალადობრივი დანაშაულების ყველაზე მძიმე შეფასება. ამ ტიპის ძალადობებს ჰქონდა მასობრივი და სისტემური ხასიათი. მიზეზი არის სხვადასხვა. ხელისუფლებას სჭირდებოდა ყოფილიყო ტოტალური შიში და უსამართლობის განცდა. ასე გაცილებით იოლი სამართავი იქნებოდა პენიტენციალური სისტემა. პატიმრებს აიძულებდნენ გამოეტანათ საჩივრები ევროსასამართლოდან, აიძულებდნენ ეღიარებინათ ისეთი დანაშაულები,რომლებიც არ ჰქონდათ ჩადენილი. წამების მეთოდები იყო სასტიკი, მათ შორის წამება მოხრჩობით, დაკიდებით, ელექტროდენით, წყალში ჩაძირვით. ამ პროცესში, სამწუხაროდ, ჩართული იყიო ყველა უწყება. მათ შორის პოლიცია, პროკურატურა, სასჯელაღსრულების სამინისტრო, სასამართლო, ხშირად სახალხო დამცველის ოფისიც. ბოლო წლებში წამება გაქრა მისი ანგარიშებიდან.
6000-ზე მეტი განცხადებაა შესწავლილი, შედეგები არის უმძიმესი. ჯგუფი სწავლობდა მიზეზებს, შედეგებს, მასშტაბს და რეკომენდაციებზეც მუშაობდა. ეს დოკუმენტი წარედგინა პარლამენტს, რომელმაც უნდა მიიღოს განსაკუთრებული შემაჯამებელი რეზოლუცია. პარლამენტი სახელს დაარქმევს ამ დანაშაულებს. მიღებული იქნება ახალი სტანდარტი ადამიანის უფლებების კუთხით,რომელიც გამორიცხავს და დააზღვევს,რომ სახელმწიფო არასოდეს არ აღმოჩნდება მწამებლისა და მჩაგვრელის როლში.
საქართველო პატიმართა რაოდენობით ევროპის ქვეყნებს შორის პირველ ადგილზე იყო. 300000-ზე მეტი რეპრესიული გადაწყვეტილება არის გამოტანილი. ეს იყო 9-წლიანი ტირანია, უსასტიკესი და დაუნდობელი რეჟიმი,რომელმაც ბევრი ადამიანი იმსხვერპლა.
ჩვენ ვაპირებთ გავამკაცროთ სისხლის სამართლის კოდექსის კონკრეტული მუხლი. თუ წამებას ადამიანის სიცოცხლის ხელყოფა მოჰყვება, შეიძლება უვადო პატიმრობაც იქნეს გამოყენებული. ასევე არ გამოვლინდება ხანდაზმულობა წამების საქმეებზე,“ – განაცხადა ეკა ბესელიამ.
მანანა ღოღობერიძე
