„2012 წელს უმუშევრობა იყო 15 %, ნელი ნაბიჯებით ამ რიცხვს ვამცირებთ 12 %-მდე. ეკონომიკა ნელა, მაგრამ მაინც ვითარდება. პრობლემები დღეს არ დაბადებულა და მისი მოგვარება მყისიერად არ ხდება. „ქართული ოცნების“ მთავრობა ამ ნაბიჯებს თანმიმდევრულად დგამს“. ამის შესახებ ფინანსთა მინისტრმა ნოდარ ხადურმა „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„2016 წელს ცოტათი, მაგრამ საქართველოს მოსახლეობა უკეთ ცხოვრობს, ვიდრე 2012 წელს. ვაგრძელებთ მუშაობას იმ დაპირებების შესასრულებლად, რომლებზეც ვსაუბრობდით. ეს ხდება კერძო სექტორში განხორციელებული ინვესტიციების ხარჯზე. 30 ათასზე მეტმა ადამიანმა იშოვა სამსახური კერძო სექტორში.
მაჩვენებლების არასრული ანალიზი ხდება. მხოლოდ თავდაცვის სამინისტროში, დაბალი და საშუალო რანგის სამხედრო მოსამსახურეების შრომის ანაზღაურება 110 მილიონი ლარით არის გაზრდილი. სახელმწიფო ბიუჯეტზე გადმოვიდა სახანძრო და სამაშველო სამსახურები. მინისტრების შრომის ანაზღაურება არის 40 %-ით შემცირებული. არც ერთი მინისტრის და მინისტრის მოადგილის ხელფასი გაზრდილი არ არის და არც გაიზრდება. ძალოვანი სამსახურები არის დეპოლიტიზირებული. ეს ყველაფერი საქართველოს ეკონომიკურად მიმზიდველს ხდის. პირდაპირი უცხოური ინვესტიციები 103 %-ით არის გაზრდილი, ეს ადასტურებს, რომ ქვეყანა სწორი გზით ვითარდება.
პენსია 110 ლარიდან 1 ივლისს გახდება 180 და სექტებრიდან მაღალმთიან რეგიონებში 216 ლარი. ის, რომ იზრდება მასწავლებლების შრომის ანაზღაურება, არის დაპირებების ასრულება. ის, რომ ადამიანებზე არ ძალადობენ და ადამიანის უფლებები დაცულია, არის მიღწევა. ეს არ ნიშნავს, რომ პრობლემებს ვერ ვხედავთ. იყო შეცდომები, რომლებიც უნდა გადასინჯულიყო,“ – განაცხადა ნოდარ ხადურმა.
მანანა ღოღობერიძე
