„გიორგი კვირიკაშვილი ერთხელ შეგვხვდა, თუმცა ამას შეხვედრასაც ვერ დავარქმევთ. დაპირებული ცვლილებები საარჩევნო კოდექსში არ შევიდა. ვფიქრობდი,რომ თავისი სიტყვის ფასს არ დააგდებდა ძირს, მაგრამ უბრალოდ მოიტყუა“. წინასაარჩევნო გარემოს მდგომარეობაზე პარტია „თავისუფალი საქართველოს“ თავმჯდომარე კახა კუკავამ ტელეკომპანია „GDS“–ზე, გადაცემა „2030“–ის ეთერში ისაუბრა.
„გიორგი კვირიკაშვილი სიტყვის დონეზე ბევრ კარგ რამეს ამბობდა, მაგრამ სამწუხაროდ მატყუარა გამოდგა. მან ეს დაპირებები მხოლოდ საქართველოს ოპოზიციას არ მისცა, სტრასბურგში საპარლამენტო ასამბლეის გამოსვლაზეც იგივე გაიმეორა. ყოფილი პრემიერ–მინისტრი, ღარიბაშვილიც ისე დიანიშნა და ისე გადადგა,რომ ერთი შეხვედრაც ოპოზიციასთან არ გაუმართია.
პრეზიდენტთან არაერთი კონსულტაცია გვქონდა. სხვა სახელმწიფო ჩინოვნიკისგან განსხვავებით ის არ ემალება ოპოზიციას. მიუხედავად იმისა, რომ მისთვის ხმა არ მიმიცია, ბევრჯერ დავუჭირე მხარი. გიორგი მარგველაშვილში ვხედავ იმ თვისებებს, როგორიც არ მახსოვს საერთოდ საქართველოს რომელიმე მთავრობის მეთაურს ჰქონოდეს. ის არ წარმოადგენს პარტიას, ყოველთვის ცდილობს იყოს დაბალანსებული და ყველა მოქალაქის პრეზიდენტი.
ცესკოში ვიმყოფებოდი და ტექნიკური საკითხები განვიხილეთ. მას არ აქვს ფართო კომპეტენცია, არ შეუძლია კოდექსის შეცვლა და გარემოს გაუმჯობესება. თუმცა რაზეც ვისაუბრეთ საინტერესო საკითხი იყო ამომრჩევლის მოსყიდვის და ადმინისტრაციული რესურსის გამოყენების ფაქტები. მათზე საჩივრების განხილვა შედის ცესკოს კომპეტენციაში. სამართალწარმოება დაწყებულია რიმა ბერაძის მიერ ამომრჩევლის მოსყიდვასთან დაკავშირებით. ეს არის პრეცენდენტული საქმე და როგორც დადგინდება პრაქტიკა პირველ ფაქტზე, ისე წარიმართება მთელი საარჩევნო კამპანია. ჯობს ცოტათი მმართველი პარტია დაზარალდეს და ქვეყნის იმიჯმა მოიგოს მეტი.
საოლქო კომიტეტების დაკომპლექტება უკვე დასრულდა, რაც შეეხება საუბნო კომიტეტებს, თავმჯდომარის პოსტზე არის ვაკანტური ადგილები. მთავარია, რომ ექვს–კაციანი პროფესიული კვოტა არ აითვისოს მმართველმა პარტიამ. „ნაციონალების დროს“ საოლქო კვოტა იყო მათი დანიშნული, ახლაც ის მმართველმა პარტიამ ჩაიგდო ხელში. რაც შეიძლება მეტი განცხადება უნდა შევიდეს საუბნო კომისიებში,რომ იქ მაინც გაიმართოს რეალური კონკურსი. ამ ხელისუფლების პირობებში მთლიანად საარჩევნო გარემოს გაუმჯობესება ვერ ხერხდება, მაგრამ რაღაც კომპონენტებში მაინც უნდა შევძლოთ მეტი გარანტიების მიღწევა.
საარჩევნო გარემო ნამდვილად არის „ნაციონალების“ პერიოდის საარჩევნო გარემოზე უკეთესი, თუმცა ასეთი შედარება არასწორია. ჩვენ უზბეკეთს და ჩრდილოეთ კორეას არ უნდა შევედაროთ. უნდა ვიფიქროთ, რომ გერმანიის და საფრანგეთის საარჩევნო გარემოზე ბევრად უარესია. ოპოზიციის მოთხოვნებს, მანიფესტებს, საარჩევნო კოდექსის ცვლილების პროექტებს მე და უსუფაშვილი ხელით ვწერდით ყოველ საღამოს. მერე იბეჭდებოდა და ნახულობდა ყველა. არ მეგონა თუ მასთან საარჩევნო კოდექსზე ვიკამათებდი,” – აცხადებს კუკავა.
მანანა ღოღობერიძე
