ლიტერატურის სფეროს წარმომადგენლები, პიონერები მეცნიერებაში, ადამიანები, რომლებმაც გადაარჩინეს სხვების სიცოცხლე და იცავდნენ მათ უფლებებსა და თავისუფლებას.
ნობელის ოფიციალურ საიტზე მკითხველისთვის წარმოდგენილია პრიზიორი ქალები სხვადასხვა დარგში. „თბილისი თაიმსი“ რეიტინგის პირველ ათეულს გაგაცნობთ.
მარი სკლოდოვსკა-კიური – პოლონელი ქიმიკოსი და ფიზიკოსი. მას ორჯერ მიენიჭა ნობელის პრემია 1903 და 1911 წელს. მან აღმოაჩინა ქიმიური ელემენტები პოლონიუმი და რადიუმი. 1911 წელს პირველმა მოამზადა რადიუმის ეტალონი, რომელიც 24 წლის განმავლობაში მსოფლიოში ერთადერთი იყო. 1914 წეს იყო პარიზის სამედიცინო აკადემიის პირველი წევრი ქალთა შორის.
დედა ტერეზა- 1979 წელს მას მიენიჭა ნობელის პრემია მშვიდობის დარგში. ის 40 წლის განმავლობაში კალკუტის ღარიბთა, დავრდომილთა და ობოლოთა თავშესაფარში ეხმარებოდა ადამიანებს. 2003 წელს კი, კათოლიკურმა ეკლესიამ წმინდანად შერაცხა.
სვეტლანა ალექსევიჩი – ნობელის პრიზიორი ლიტერატურის დარგში. 2015 წელს გადაეცა ნობელი ლიტერატურული მოღვაწეობის გამო. მის წიგნებში გაკრიტიკებულია საბჭოთა და მოგვიანებით ბელარუსიის პოლიტიკური რეჟიმები.
ტუ იუიუ – ჩინელი ფარმაკოლოგი,რომელსაც ნობელის პრიზი მედიცინის ან ფიზიოლოგიის დარგში 2015 წელს გადაეცა. იუიუმ მალარიის მკურნალობის ახალი მეთოდები აღმოაჩინა.
მეი-ბრიტ მოზერი – მას თავის მეუღლესთან ერთად ნობელის პრემია გადაეცათ ფიზიოლოგიის ან მედიცინის დარგში, 2014 წელს. მათ ტვინში უჯრედთა სისტემა აღმოაჩინეს, სისტემა სივრცეში ორიენტაციას განსაზღვრავს.
მალალა იუსუფი – 2014 წელს მიენიჭა ნობელის პრემია მშვიდობის დარგში. ის ადვოკატირებს ქალთა განათლების უფლებას. მალალა ყველაზე ახალგაზრდა ნობელის პრემიის ლაურეატია.
ტავაკულ კარმანი – იემენელი უფლებათა დამცველი. ნობელის პრემიის ლაურეატი მშვიდობის განმტკიცების დარგში 2011 წელს გახდა. მას პრიზი ქალების უსაფრთხოებისა და ქალების უფლებებისთვის არაძალადობრივი ბრძოლისა და სამშიდობო საქმიანობაში აქტიური მონაწილეობისთვის გადაეცა.
ჰერტა მიულერი – რუმინული წარმოშობის გერმანულენოვან მიულერს კომუნისტური ტოტალიტარიზმის პირობებში ცხოვრების აღწერისთვის ლიტერატურის დარგში ნობელის პრემია 2009 წელს მიენიჭა. მისი წიგნები ეხება საბჭოთა კავშირის რეპრესიებს.
რიტა ლევი მონტალჩინი – იტალიელი ბიოქიმიკოსი,რომელსაც ნობელი გადაეცა 1986 წელს მედიცინისა და ფიზიოლოგიის დარგში. მან აღწერა ადამიანის ნერვული სისტემის ზრდისა და განვითარების პროცესი.
დორის მეი ლესინგი – ცნობილ ინგლისელ მწერალსა და ფემინისტს ნობელის პრემია „ქალური გამოცდილების ეპოსის“ შექმნისთვის გადაეცა. მისი წიგნები მსოფლიოში დიდი პოპულარობით სარგებლობს. ის ლაურეატი 2007 წელს გახდა ლიტერატურის დარგში. ნობელის ოფიციალურ საიტზე წერია, რომ ნობელი გადაეცა მას იმისთვის, რომ „დაწერა, თუ როგორ და რატომ ვცხოვრობთ ჩვენ“.
თემაზე მუშაობდნენ:
გიორგი მიქანაძე
ნათია კეკენაძე
