ჩვენთვის ძალიან მნიშვნელოვანია, რომ ჯარი და სამხედრო უწყება მაქსიმალურად იყოს მოშორებული პოლიტიკურ დაპირისპირებებს, – ამის შესახებ საქართველოს პრემიერ-მინისტრმა გიორგი კვირიკაშვილმა თავდაცვის სამინისტროში განაცხადა, სადაც თანამშრომლებს უწყების ახალი ხელმძღვანელი წარუდგინა.
კვირიკაშვილმა ახალ მინისტრს წარმატებები უსურვა და განაცხადა, რომ იზორიას წარმატებაში ეჭვი არ ეპარება. პრემიერის თქმით, ქვეყნის თავდაცვისუნარიანობის მიმართულებით ძალიან ბევრი სამუშაოა განსახორციელებელი.
„რა თქმა უნდა, უნდა მოხდეს პრიორიტეტიზაცია იმ რესურსების არსებობის პირობებში, რომელიც ჩვენ გაგვაჩნია, რომ მაქსიმალურად იქნას მიმართული ყველა რესურსი თავდაცვისუნარიანობის განმტკიცებისთვის. ჩვენ გვაქვს სამოქმედო გეგმები, ევროატლანტიკურ სფეროში ინტეგრაციის მიმართულებით. უნდა აღინიშნოს ბოლო პერიოდში შეერთებულ შტატებთან გაფორმებული მემორანდუმის მნიშვნელობა, რომელიც ძალიან ბევრ შესაძლებლობას იძლევა. ძალიან მნიშვნელოვანია ასევე, რომ ჯარი და სამხედრო უწყება, მაქსიმალურად იყოს მოშორებული პოლიტიკურ დაპირისპირებებს და ის უნდა იყოს მაქსიმალურად დეპოლიტიზირებული უწყება. ჩვენ ამას შევძლებთ“,- განაცხადა პრემიერ-მინისტრმა.
მისივე თქმით, ამ უწყებიდან ყველაზე მეტად უნდა გამოდიოდეს ქვეყნის ერთიანობის სულისკვეთება.
