საქართველოს ფინანსთა მინისტრის 2013 წლის 15 აგვისტოს №271 ბრძანებით, სასაქონლო საბაჟო დეკლარაციის წინასწარი წარდგენის ვადა განისაზღვრა 30 კალენდარული დღით საქონლის შემოტანამდე, ამის შესახებ ვრცელდება ინფორმაცია შემოსავლების სამსახურის ვებ-გვერძე.
მათივე ცნობით, მიმდინარე წლის 30 აგვისტოს ძალაში შედის საქართველოს ფინანსთა მინისტრის 2013 წლის 15 აგვისტოს №271 ბრძანება „საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციის დამტკიცების თაობაზე“ საქართველოს ფინანსთა მინისტრის 2012 წლის 26 ივლისის №290 ბრძანებაში ცვლილების შეტანის შესახებ“, რომლითაც სასაქონლო საბაჟო დეკლარაციის წინასწარი წარდგენის ვადა განისაზღვრა 30 კალენდარული დღით საქონლის შემოტანამდე. აღნიშნული ვადის დარღვევით საქონლის საქართველოს საბაჟო ტერიტორიაზე შემოტანის შემთხვევაში, სასაქონლო საბაჟო დეკლარაცია ჩაითვლება ძალადაკარგულად და დეკლარანტს წარმოეშობა საქონლის ხელახალი დეკლარირების ვალდებულება.
ცვლილება ასევე ითვალისწინებს ნავთობის ბიტუმზე იმპორტის სასაქონლო ოპერაციის გამოყენებისას სინჯის აღებისა და ლაბორატორიული გამოკვლევის შედეგად ხარისხის შესაბამისობის დადასტურების ვალდებულების გაუქმებას. ასეთ საქონელზე სინჯის/ნიმუშების აღება და მისი გამოკვლევა განხორციელდება რისკის პროფილების გამოყენებით შერჩეული კონტროლის ღონისძიებების შესაბამისად, -ნათქვამია შემოსავლების სამსახურის გავრცელებულ ინფორმაციაში.
22.08.13