„ელემენტარული აზროვნება ვისაც შეუძლია დამერწმუნება,რომ აქ არ შეიძლებოდა „ქართული ოცნების“ ინტერესი ყოფილიყო არჩევნებამდე ოთხი დღით ადრე. რომელი კენედი არის გივი თარგამაძე, ვის რაში სჭირდებოდა მის წინააღმდეგ აქტის განხორციელება?“. ამის შესახებ პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა „ტვ–პირველზე“, გადაცემა „ინგა გრიგოლიას დღის ამბების“ ეთერში ისუაბრა.
„მე ამას ერთმნიშვნელოვნად დავარქმევდი პოლიტიკურ აქტს. ჩვენ ყველა ძალისხმევას მივმართეთ იმისათვის,რომ ქვეყანაში ყოფილიყო მშვიდი, თავისუფალი საარჩევნო გარემო და არჩევნები ჩაგვეტარებინა ღიად, დემოკრატიულად. ჩვენ ოპონენტებს ეს აშინებთ იმიტომ, რომ თავისუფალი არჩევნების პირობებში პროვოკაციების, დესტაბილიზაციის გარეშე მათი პოლიტიკური პერსპექტივები ნულს უტოლდება. „ქართულ ოცნებას“ და ხელისუფლებას ვერ ექნება ვერანაირი ინტერესი. პირიქით, ეს არის მიმართული ქვეყნის ინტერესების საწინააღმეგოდ.
მნიშვნელოვანია დეტალები. ეს ხდება კურიერის გაშვების დროს, ეს ხდება იმ დროს,როდესაც „ნაციონალური მოძრაობა“ ახდენს საკუთარი გუნდის პრეზენტაციას „რუსთავი–2“–ზე, როდესაც მეორე დღეს დაგეგმილია „ნაციონალური მოძრაობის“ შეკრებითი ღონისძიება და როდესაც უკვე დღეს უნდა მიღებულიყო ვიზალიბერალიზაციასთან დაკავშირებით საბოლოო გადაწყევტილება. მათი ერთადერთი მიზანია არჩევნების საშუალებით და დესტაბილიზაციით ვიწრო პოლიტიკური ინტერესი გაატარონ. ნებისმიერი ასეთი გეგმა გაშიფრულია და ადეკვატური პასუხი გაეცემა. ეს ბოლო ხელის მოქნევა იყო იმისათვის,რომ აქციისთვის ხალხი მოეგროვებინათ. მათ აინტერესებთ როგორ გაზარდონ ემოციური ფონი და დასავლეთის თვალში მსხვერპლი გამოჩნდნენ.
მომხდარის სამართლებრივი შეფასება საგამოძიებო ორგანოებს დავუთმოთ, კვალიფიკაციის შეცვლა და ფორმულირება ყოველთვის შესაძლებელია.მთავარია რომ ეს გამოძიება მალე დასრულდეს, მე ვსაუბრობ წუთებზე და საათებზე. უმჯობესია საქმის დეტალების დადგენა არჩევნებამდე მოხდეს და ვიცი რომ სამართალდამცავი ორგანოები 24 საათის განმავლობაში მუშაობენ,“–განაცხადა ირაკლი სესიაშვილმა.
მანანა ღოღობერიძე
