„ცესკოს შედეგების სანდოობასთან კითხვები არ გვაქვს, საბოლოო ჯამში ცესკოს მონაცემები თითქმის ემთხვევევა ჩვენს მიერ ჩატარებულ ხმების პარალელური დათვლის შედეგებს. მნიშვნელოვან ცვლილებას არ უნდა ველოდეთ“. აის შესახებ არასამთავრობო ორგანიზაცია „სამართლიანი არჩევნების“ აღმასრულებელმა დირექტორმა მიხეილ ბენიძემ „მაესტროს“ ეთერში, გადაცემა „ღამის კონტაქტში“ ისაუბრა.
„იყო დიდი რაოდენობით პროცედურული ხარვეზები. თუმცა იყო არსებითი დარღვევებიც. მნიშვნელოვანია ძალადობრივი ქმედებები ხმის დათვლის დასრულებამდე. მარნეულში იყო ძალადობრივი ქმედება უშუალოდ კენჭისყრის დასრულებამდეც. ყველა ასეთ შემთხვევაზე მოვახდინეთ რეაგირება, დაწერილი გვაქვს საჩივრები და ველოდებით განხილვას. განსაკუთრებულ პრობლემურ შემთხვვებში, მაგალითად სამეგრელოს 66–ე ოლქში, 79–ე და 38–ეუბნების შედეგების ბათილობას ვითხოვთ. ასეთი შემთხვევები იყო იზოლირებული და საერთო ჯამში პროპორციული არჩევნების შედეგზე გავლენას ვერ მოახდენდა. მაგრამ ამ უბნების შედეგებს შესაძლოა ჰქონოდა გავლენა მაჟორიტარული არჩევნების კუთხით შედეგებზე.
არჩევნებზე საუბრისას იგულისხმება წინასაარჩევნო გარემოც და არჩევნების შემდგომი პერიოდიც. წინასაარჩევნო გარემო პოზიტიურად შევაფასეთ, თუმცა იყო ზეწოლის, მუქარის, დაშინების შემთხვევები. მათ შორის სუს–ის ჩართულობა. ასეთი შემთხვევების რაოდენობა დრამატულად დიდი არ იყო, თუმცა მიუხედავად ამისა ეს მცირე შემთხვევებიც საყურადღებოა.
რაც შეეხება ბოიკოტს, ეს არის პოლიტიკური გადაწყვეტილება, შეიძლება აქვს ასეთი ბრძოლის ხერხი „ნაციონალურ მოძრაობას“. თავისთავად ბოიკოტი არაფერს ნიშნავს მეორე ტურების მხრივ, თუ რა თქმა უნდა ოფიციალური განცხადება არ გააკეთეს კომისიებთან, რომ წყვეტენ ბრძოლას მეორე ტურზე. მხოლოდ საჯარო განცხადება არ იქნება საკმარისი.
ბევრ შემთხვევებში იყო კომპეტენციის პრობლემა საოლქო კომისიებში. იყო კომიკური შემთხვევევც. ოლქების ასლების მისაღებად მოგვთხოვეს მოსაკრებლის გადახდა. გვითხრეს, რომ აქვთ ორი დღის ვადა შემაჯამებელი ოქების გადმოსაცემად, რაც სრულიად დაუშვებელია. ეს ფაქტები აჩენს კითხვებს,“–განაცხადა მიხეილ ბენიძემ.
მანანა ღოღობერიძე
