“მსოფლიო ბანკის რეიტინგში გაერთიანებულია 190 ქვეყანა და ჩვენ 23-ე ადგილიდან მე-16 პოზიციაზე გადმოვინაცვლეთ. 24-ე პოზიციით დავასრულეთ შარშანდელი წელი, თუმცა გადაანგარიშებით ერთი პოზიციით წინ გადმოგვიყავნეს”. ამის შესახებ ეკონომიკის მინისტრმა დიმიტრი ქუმსიშვილმა ტელეკომპანია “იმედის” ეთერში, გადაცემა “ქრონიკაში” ისაუბრა.
მსოფლიო ბანკმა ხუთი კონკრეტული რეფორმა აღიარა . ჩვენ გვაქვს კონკრეტული გეგმები მომავალში ეს პოზიცია კიდევ უფრო როგორ გავიუმჯობესოთ. როდესაც 2013 წელს ჩვენი რეიტინგი გაუარესდა, ამ დროს მსოფლიო ბანკმაც დაადასტურა, რომ ეს მოხდა არა იმიტომ, რომ ქვეყანაში რეფორმები არ განვახორციელეთ ან ქვეყანაში არ იყო პროგრესი. ამის მიზეზი იყო ის, რომ მსოფლიო ბანკმა დახვეწა თვითონ მეთოდოლოგია და შესაბამისად ხარისხობრივი მაჩვენებლები გაიზარდა. ახლა გაცილებით უფრო საამაყოა ჩვენი მიღწევა. დახვეწილი მეთოდოლოგიის პირობებში შვიდი პოზიციით გავიუმჯობესთ ჩვენი რეიტინგი და ვართ ტოპი იმ ათ ქევყანას შორის, რომელსაც ყველაზე მეტი რეფორმა ჰქონდა წინა წელს.
ბიზნესის კეთების რეიტინგით მსოფლიო ბანკი კონკრეტულად ზომავს რეფორმებს და რეფორმების შდეგებს ბიზნესზე. როცა ჩვენი ქვეყანა კონკრეტულ რეიტინგებში დაწინაურდება, ეს ნიშნავს, რომ კერძო სექტორსა და სახელმწიფოს შორის ურთიერთობა გაუმჯობესდა, ბიზნესი გახდა უფრო კონკურენტური. ეს რა თქმა უნდა ნიშნავს დიდ შემოსავალს და მეტ მოგებას ბიზნესმენებისთვის, რაც აისახება დანაზოგებში, ხელფასებში, ახალი სამუშაო ადგილების შექმნაში”.
დიმიტრი ქუმსიშვილმა ეროვნული ვალუტის გაუფასურებაზეც ისაუბრა.
” როდესაც კურსი არის მცურავი, აქ ბაზარი, მოთხოვნა და მიწოდება ადგენს რა გვექნება კურსი ერთი დღიდან მეორემდე. ჩვენ სხვა ამოცანა უნდა გადავჭრათ. კურსზე კი არ უნდა ვაკეთოთ კომენტარები, არამედ უნდა ვიყოთ დამოკიდებული უცხო ქვეყნის ვალუტაზე და ვიფიქროთ რომ ნებისმიერი ცვლილება აისახება მოსახლეობაზე. კურსი აისახება ინფლაციაზე, ფასების ზრდაზე. პროგნოზს ვერ გავაკეთებ და არ გავაკეთებ. თუმცა ერთადერთი შემიძლია თქმა, რომ მაკროეკონომიკურ ფუნდამენტში არაფერი ისეთი არ ხდება, რაც ლარის გაუფასურებას იწვევს. მნიშვნელოვანია, რომ მოლოდინები ცუდად აისახება ჩვენს ვალუტაზე. არასწორად განწყობილი ადამიანები არასწორ მოლოდინებს ქმნიან, რაც ზეწოლას იწყებს ვალუტაზე და ნეგატიურად აისახება”.
მანანა ღოღობერიძე
