„ეს არის ქართული საზოგადოების უფლება და სანამ შენ მათ ამას აართმევ, კარგად უნდა აუხსნა რატომ აკეთებ ამას . იმით ვერ ახსნი, რომ მარგველაშვილი არ არის კარგი პოლიტიკოსი, ან შენ არ მოგწონს. უნდა აუხსნან ამომრჩეველს, რატომ არ აქვს უფლება აირჩიოს ქვეყნის პირველი პირი“. პრეზიდენტის არჩევის წესის ცვლილებაზე და სხვა შესაძლო საკონსტიტუციო ინიციატივებზე პრეზიდენტმა გიორგი მარგველაშვილმა „რუსთავი 2“–ზე, გადაცემა „არჩევანის“ ეთერში ისაუბრა.
„უცნაური იყო, არჩევნების მეორე ტური დანიშნულიც არ იყო, რომ დაიწყო საუბარი თითქოს კონსტიტუცია შესაცვლელია და პრობლემას წარმოადგენს პრეზიდენტის არჩევის პრაქტიკა, რომელიც ასეთი ბუნებრივია ქართული პოლიტიკური რეალობისთვის. არსებობს საპარლამენტო, საპრემიერო, სუპერ საპრეზიდენტო რესპუბლიკები. ეს ყველა სისტემა ფუნქციონირებს დემოკრატიულ საზოგადოებაში. კითხვის ნიშანი ისმება თუ რა აუცილებლობას წარმოადგენს ესა თუ ის ცვლილება. ეს ყველაფერი ტოვებს პირადი ანგარიშსწორების შთაბეჭდილებას.
ბუნებრივად გამოჩნდა, რომ ამ იდეას რეალური საფუძველი არ გააჩნია, არ არის კავშირში იმ გამოწვევებთან და საჭიროებებთან ,რომელიც ქართულ საზოგადოებას აქვს, ეს არ არის პრობლემა. ვინმემ აზრიანად გამაგებინოს ამ საკითხის შემდეგ რა წყდება, ან რომელი პრობლემა უნდა მოგვარდეს, მიებმება სამართლიან სასამართლოს, დასაქმებას, ჯანდაცვას, თუ რასთან არის კავშირში. თუმცა საკონსტიტუციო უმრავლესობის პირობებში ეს შესაძლებელია. იქნებ რომელიმე გამორჩეულ პოლიტიკოსს თავში მოუვიდეს იმპიჩმენტი და წამოიწყოს ეს პროცედურა. მე მაინც ოდიოზურ პირებად მიმაჩნია ის პირები, რომლებიც საუბრობენ თუნდაც პრეზიდენტის უფლებამოსილების ვადაზე ადრე შეწყვეტაზე, ეს უბრალოდ ეფემერული ფანტაზიის შედეგია.
პარლამენტის თემა თვითონ პარლამენტის გადასაწყვეტია. როგორ იქნება არჩეული პრეზიდენტი ან რა უფლებამოსილება ექნება, არ არის ერთჯერადი საკითხი. თუმცა პარლამენტი რომელ ქალაქში იქნება, ტექნიკური საკითხია. სხვა საკითხია ასევე რამდენად უნდა ეწეროს ეს კონსტიტუციაში. რაც შეეხება ქორწინების შესახებ ჩანაწერს, ზუსტად იგივე ჩანაწერი არსებობს სამოქალაქო კოდექსში და თუ დანახვადია ჰომოფობიური ტენდენციები, წლების განმავლობაში უნდა დაგვენახა. ეს საკითხი წინასაარჩევნო სპეკულაციად მიმაჩნია და არა დამოუკიდებელ, კონსტიტუციაში ასატან თემად. ეს თემა იყო მოტანილი ჩემამდე რეფერენდუმის მოთხოვნით და იქვე დასრულდა“.
გიორგი მარგველაშვილმა პრემიერ–მინისტრთან თანამშრომლობაზე და თავდაცვის სამინისტროში მიმდინარე პროცესებზეც ისაუბრა.
„კვირიკაშვილში ვხედავ ადამიანს, რომელთანაც შეიძლება არა იჭორაო, არამედ ისაუბრო პოლიტიკაზე, პოლიტიკურ პროცესებზე. კმაყოფილი ვარ, რომ ფუნქციები სწორად არის დელეგირებული და გაყოფილი. ვინ იქნება მინისტრი და ვინ კომიტეტის თავმჯდომარე, ამაზე კონსულტაციები ჩემსა და კვირიკაშვილს შორის არ მიმდინარეობს.
გვქონდა მიზანი, რომ 2016 წლის ბოლოსთვის გადავიდოდით პოფესიულ არმიაზე, რაც გულისხმობს გაწვევის სრულიად გაუქმებას. თუმცა რეალურად მოხდა არა კანონის შეცვლა, არამედ ერთჯერადად გაწვევის გაუქმება. პრობლემა განსახილველია, რა ტიპის სამხედრო სამსახური უნდა ჩამოყალიბდეს, ამაზე უფრო ღრმად და სერიოზულად, უშიროების საბჭომ უნდა ისაუბროს“.
მანანა ღოღობერიძე
