ივ. ჯავახიშვილის სახელობის თბილისის სახელმწიფო უნივერსიტეტში დღეს ცნობილი ქართველი კომპოზიტორის, გია ყანჩელის საღამო გაიმართება.
თბილისის სახელმწიფო უნივერსიტეტის ინფორმაციით, საღამოზე ექსკლუზიურად თსუ-ის სტუდენტებისთვის მოეწყობა კომპოზიტორის ერთ-ერთი ყველაზე ცნობილი სიმფონიის DIX-ის ნიუ-იორკში შესრულების ვიდეოჩანაწერის ჩვენება. ჩვენების შემდეგ კი გია ყანჩელი სტუდენტების კითხვებს უპასუხებს.
მათივე ინფორმაციით, ღონისძიებაში მონაწილეობას მიიიღებენ, ნატო მეტონიძე, ლიზა ბაგრატიონი და მევიოლინე გიორგი ცაგარელი. საღამოს აკომპანირებას ნიკოლოზ რაჭველი გაუწევს.
საღამოზე მოწვეულ სტუმრებს შორის არიან, ჟანრი ლოლაშვილი, ელდარ შენგელაია, ზურა ყიფშიძე, ლენუკა ყიფშიძე. თეატრალური უნივერსიტეტის დასი კი კოტე ფურცელაძის დადგმას „ხანუმა“ წარადგენს. ღონისძიებაში მონაწილეობას ასევე მიიღებენ, სახელმწიფო კონსერვატორიის სიმფონიური ორკესტრი, თსუ მოცეკვავეები, ყანჩელის მუსიკაზე დადგმულ ტანგოს წარადგენენ, მომღერალ ქალთა კაპელა კი სიმფონიას „ყვითელი ფოთლები“ შეასრულებენ.
ღონისძიების ორგანიზატორია თსუ სტუდენტური თვითმმართველობის კულტურის დეპარტამენტი.
