„ამისთვის ვართ აქ და გვევალება, რომ გავაჟღეროთ საზოგადოების წუხილი. კრიმინოგენული ვითარება ვერაფრით ვერ აღიარა შინაგან საქმეთა მინისტრმა. რა თქმა უნდა თუ ისინი ამ ვითარებას არ აღიარებენ, არანაირი გეგმა კრიმინალის დამარცხების არ ექნებათ. არანაირი ხედვა პრობლემების გადაჭრის, არ აქვთ“. ამის შესახებ „ერთიანი ნაციონალური მოძრაობის“ წევრმა ელენე ხოშტარიამ ტელეკომპანია „იმედზე“, გადაცემა „ქრონიკის“ ეთერში ისაუბრა.
„მესამე დღეა ვცდილობთ გავაგებინოთ ხელისუფლებას და დავუსვათ საგნობრივი, შინაარსობრივი შეკითხვები. ეს არის „რუსთავი 2“–ის შევიწროვების და თავდასხმის საკითხი, სასამართლოს, ლარის პრობლემები, სოციალური საკითხები, კრიმინალური ვითარება. საპასუხოდ ვიღებთ ერთი მხრივ ამ საკითხების სრულ იგნორირებას და თვითკმაყოფილებას. ერთმანეთზე საქებარი სიტყვების თქმას და აღფრთოვანებას ვერ ასწრებენ, თუ როგორი გადასარევი გუნდია, როგორ კარგად არის ყველაფერი. მეორე მხრივ გვესმის რეალობის სრული უარყოფა. მესამე რასაც ვისმენთ, არის პირდაპირი შეურაცხყოფა. ეს ხდება იმ ფონზე, როდესაც ისინი გამოსვლების მთელ დროს კარგავენ მითითებებში, რომ ვიყოთ კონსტრუქციულები“.
ელენე ხოშტარიამ ტელეკომპანია „რუსთავი 2“–ის სასამართლო პროცესზეც ისაუბრა.
„სამართლებრივი განხილვის ყველა ეტაპზე, დაწყებული ურთმელიძის სამარცხვინო ეტაპიდან, რომელიც ყველა არასამთავრობო ორგანიზაციამ და ამერიკის შეერთებულმა შტატებმა გააკრიტიკა, ყველგან ვნახეთ კონკრეტული აგრესიული, ბინძური შანტაჟი და გადაწყვეტილებების ძალადობით მიღება. დიდი პალატის ეტაპზე გვაქვს კონკრეტული ინფორმაცია, და კონკრეტული გვარები, ესენი არიან: გვენეტაძე, წულუკიანი, ფარცხალაძე და თადუმაძე. მათ აქვთ დავალებული, რომ 30 ოქტომბერს განახორციელონ ხელისუფლების მხრიდან „რუსთავი 2“– ის მიტაცება. მთავარი დამკვეთი ბუნებრივია არის ბიძინა ივანიშვილი“.
მანანა ღოღობერიძე
