ქართული მხარე მიესალმება ე.წ ტრიალოგის ფორმატში შეთანხმებას, საქართველოსთვის სავიზო ლიბერალიზაციის მინიჭებასთან დაკავშირებით.
როგორც საგარეო საქმეთა მინისტრის პირველმა მოადგილე დავით ზალკალიანმა ჟურნალისტებს განუცხადა, ეს იმას ნიშნავს, რომ ჩვენ ფინალურ ფაზაში ვიმყოფებით და ეს პროცესი ძალიან მალე დასრულდება.
“მნიშვნელოვანია აღინიშნოს ის ფაქტი, რომ ტრიალოგის პირველივე შეხვედრაზე მოხდა საქართველოსთან შეთანხმების მიღწევა, რაც არის უაღრესად მისასალმებელი ფაქტი. იმედი მაქვს, რომ პროცედურებიც უკვე სწრაფად განვითარდება”,- განაცხადა ზალკალიანმა.
მისივე განმარტებით, შემდეგი პროცედურები ითვალისწინებს მუდმივი კომიტეტის წარმომადგენლების სხდომაზე და ასევე ლიბეს კომიტეტში ამ გადაწყვეტილების მხარდაჭერას. შემდგომ ის დაუბრუნდება ევროპარლამენტს.
“იმედია, რომ ევროპარლამენტი უახლოეს სხდომაზე უყრის კენჭს და დაამტკიცებს. ამის შემდეგ უკვე ფორმალურად მოხდება ევროპის საბჭოს მინისტრების მხრიდან მისი დამტკიცება და ამის შემდეგ ევროპარლამენტის პრეზიდენტი და ევროკავშირის თავმჯდომარე ქვეყანა ხელს მოაწერენ ამ შესწორებას და ის გამოქვეყნდება ჟურნალში. რაც შეეხება ძალაში შეწვლას, შევა იმ დღესვე, როდესაც ამოქმედდება შეჩერების მექანიზმი. იმედი მაქვს, რომ ეს პროცედურები ძალიან მალე დასრულდება და საქართველოს მოქალაქეები ისარგებლებენ იმ სიკეთით, რასაც ჰქვია ევროკავშირში თავისუფალი გადაადგილების უფლება. ეს არამარტო თავისუფალი გადაადგილებაა, ეს იქნება ძალიან მნიშვნელოვანი პოლიტიკური ნაბიჯი საქართველოს ევროკავშირში ინტეგრაციის მიმართულებით გადადგმული, რაც კიდევ უფრო დაახლოებს ადამიანებს ერთმანეთთან და საერთოდ საქართველოს ევროპეიზაციის პროცესი იქნება შეუქცევადი”,- განაცხადა ზალკალიანმა.
