„ჩვენ მიგვაჩნია, რომ ის კონსტიტუცია, რომელიც დღეს არსებობს, მოიცავს მრავალ ხარვეზს და შესაბამისად, ყველა ჩარევა, რაც ამ კონსტიტუციაში ჩვენი მხრიდან განხორციელდება, იქნება მხოლოდ მისი გამოსწორებისკენ გადადგმული ნაბიჯი. ჯერჯერობით თავს შევიკავებ, რომ კონკრეტული საკითხები გამოვყოთ“. ამის შესახებ საქართველოს პარლამენტის თავმჯდომარის პირველმა მოადგილემ, ფრაქცია „ქართული ოცნების“ წევრმა თამარ ჩუგოშვილმა „რუსთავი 2“–ზე, გადაცემა „კურიერის“ ეთერში ისაუბრა.
„ერთადერთი საკითხი, სადაც გვაქვს პრინციპული მიდგომა, ეხება საკონსტიტუციო სისტემას. იმას, რომ საპარლამენტო სისტემა არის ყველაზე დემოკრატიული და ყველაზე მართებული საქართველოსთვის. საპრეზიდენტო სისტემა გვქონია და სამწუხაროდ ცუდი გამოცდილება გვაქვს. საპარლამენტო სისტემას მეტი წარმატების რესურსი აქვს, იმისთვის, რომ კიდევ უფრო დაიხვეწოს და გაიმართოს. ჩვენი პრინციპული პოზიციაა, რომ გავაძლიეროთ საპარლამენტო სისტემა. ეს არ ნიშნავს, რომ პრეზიდენტის უფლებამოსილება შემცირდება.
საპარლამენტო სისტემებში პრეზიდენტის ინსტიტუტი და პრეზიდენტის არჩევის წესი არსებობს რამდენიმე ფორმით. არის ქვეყნები, სადაც პრეზიდენტის არჩევა ხდება პირდაპირი გზით, ან არაპირდაპირი გზით. ამაზე ჩამოყალიბებული პოზიცია არ გვაქვს. მოვუსმენთ კომისიის უმრავლესობას და ვნახავთ საით გადაიხრება აზრი. კომისიის შემადგენლობა იქნება დიდი და არ გვექნება გადამწყვეტი საკომისიო უმრავლესობა. ყველა ერთად მოვიფიქრებთ რა არის უკეთესი. პასუხისმგებლობას იმ პროდუქტზე, რომელიც კომისიის მუშაობის გზით შეიქმნება, ვერ აიღებს სხვადასხვა შტო, ეს იქნება საქართველოს პარლამენტი და ვერ იქნება პრეზიდენტი. ეს არის არა მხოლოდ „ქართული ოცნების“, ბევრი კონსტიტუციონალისტის და არასამთავრობო სექტორის პოზიცია“.
მანანა ღოღობერიძე
