საკონსტიტუციო კომისიაში 4 სამუშაო ჯგუფი შეიქმნა, რომელიც მუშაობას იანვრის შუა რიცხვებიდან განაახლებს, – ამის შესახებ კომისიის თავმჯდომარემ, ასევე პარლამენტის თავმჯდომარე ირაკლი კობახიძემ გუშინ კომისიის პირველი სხდომის დასრულების შემდეგ განაცხადა.
კობახიძის თქმით, კომისიის მთავარი ამოცანაა, კონსტიტუციის დახვეწა და ამ შედეგს აუცილებლად მიაღწევს.
პარლამენტის თავმჯდომარის თქმით, სამუშაო ჯგუფებია: ადამიანის უფლებები და სასამართლო ხელისუფლება; პარლამენტი და ფინანსების კონტროლის გადახედვის სამუშაო ჯგუფი; პრეზიდენტის, მთავრობისა და თავდაცვის საკითხების სამუშაო ჯგუფი და ასევე ტერიტორიული მოწყობისა და ადგილობრივი თვითმმართველობის სამუშაო ჯგუფი.
რაც შეეხება იმ საკითხს, თუ რამდენად მოესწრება აპრილის ბოლომდე კომისიის მუშაობის დასრულება, კობახიძემ აღნიშნა, რომ სხდომაზე ეს საკითხი განიხილეს და ვადებზე კითხვები არ დარჩენილა. თუმცა, პარლამენტის თავმჯდომარის განმარტებით, თუკი 4 თვეში ხარისხიანი პროდუქტი ვერ მომზადდება, ვადის გახანგრძლივებას წინ არაფერი უდგას.
პარლამენტის თავმჯდომარემ კიდევ ერთხელ დაადასტურა, რომ პრეზიდენტის პოზიცია კომისიაში ჩართვაში უარის თქმასთან დაკავშირებით საწყენია და იმედი გამოთქვა, რომ ეს გადაწყვეტილება გადაიხედება.
„რაც შეეხება პრეზიდენტის არჩევის წესს, მინდა გითხრათ, რომ მთავარი პოზიცია რაც გვაქვს, ეს არის, რომ ჩვენ არ გვაქვს არც ერთი წინასწარ მიღებული გადაწყვეტილება, არც ერთ დებულებასთან დაკავშირებით და ეს მიდგომა შევთავაზეთ კომისიის წევრებს. კარგი იქნება, თუ ამ მიდგომით იმუშავებენ. კომისიის მუშაობა ახალი ფურცლიდან უნდა დავიწყოთ. ერთადერთი საკითხი, რაზეც ჩამოყალიბებული პოზიცია გვაქვს, ეს არის ის, რომ საპარლამენტო მმართველობა არ შეიცვლება“, – განაცხადა კობახიძემ.
