„მიხეილ სააკაშვილი არაადეკვატურად აფასებს საკუთარი მეგობრების, მომხრეების, თანამებრძოლების გადაწყვეტილებას, ეს მისი პრობლემაა.იგი საკუთარი თავის, მეგობრების, თანაპარტიელების პრობლემა გახდა“. ამის შესახებ „ერთიანი ნაციონალური მოძრაობის“ ყოფილმა ლიდერმა და თბილისის ყოფილმა მერმა გიგი უგულავამ ტელეკომპანია „იმედზე“, გადაცემა „ქრონიკის“ ეთერში ისაუბრა.
„როდესაც დაკარგავ ყოველგვარ შეგრძნებას, თუ რას ითხოვს შენგან ხალხი, როდესაც დაკარგავ თანაგუნდელებთან ურთიერთობის შეგრძნებას, სამწუხაროდ მიხვალ იქამდე, სადამდეც მივიდა ადამიანი, რომელმაც საქართველოს ისტორიაში ფუნდამენტური როლი შეასრულა. სულ სხვა არის დღევანდელობა. მე მას ციხიდანაც არაერთხელ შევუთვალე, რომ პატივი ეცა მთელი პერიოდის ერთად ბრძოლისთვის, თანაგუნდელებისთვის. რა თქმა უნდა „ნაციონალურ მოძრაობას“ უნდა აერჩია პარტიის ახალი თავმჯდომარე, რა თქმა უნდა ეს არ აკნინებდა მიხეილ სააკაშვილის პოლიტიკურ ფიგურას. დღეს მან დაასამარა თავისი პარტია. ცხადია, რომ პარტია დაანგრია მიხეილ სააკაშვილმა.
საქართველოს სირცხვილია, რომ ქვეყნის მესამე პრეზიდენტი არის დევნილობაში. მე სააკაშვილს გვერდში ვედექი ვარდების რევოლუციიდან დაწყებული ყველა უბედურებაში და გაჭირვებაში. ყველაფერს ვაკეთებდით ერთად და ყველა შეცდომაზე ვიღებ პასუხისმგებლობას. აქ არ არის ლაპარაკი შეუფერებლობაზე, ვინმეს უკან მოტოვებაზე. საკაშვილს ლიდერობას არავინ ეცილებოდა. ჩვენ ვლაპარაკობთ პარტიის სრულფასოვან ფუნქციონირებაზე. თუნდაც 1 პროცენტით რომ მჯეროდეს, სააკაშვილს შეუძლია ივანიშვილის გვერდით გადაწევა, მე ყველაფერს დავივიწყებდი.
ჩვენ აუცილებლად მივიღებთ მონაწილეობას შემდეგ არჩევნებში, ეს არის ბრძოლის ინსტრუმენტი, შესაბამისად ამ გზით რადიკალურ ქმედებებს ვაპირებთ,“–განაცხადა გიგი უგულავამ.
მანანა ღოღობერიძე
