„როგორც ცნობილია, ორშაბათს გაცხადდება, რა გადაცემები უნდა დარჩეს არხზე და რა უნდა დაიხუროს. ჭორის დონეზე ვიცით, რომ ბევრი გადაცემა დაიხურება, ჭორის დონეზე ისიც ვიცი, რომ „რეალური სივრცე“ დაიხურება, სამწუხაროდ ვერ ვადასტურებ ინფორმაციას“. „საზოგადოებრივ მაუწყებელზე“ მიმდინარე შესაძლო რეორგანიზაციის პროცესზე, გადაცემა „რეალური სივრცის“ ავტორმა და წამყვანმა, ასევე მაუწყებლის დირექტორობის ყოფილმა კანდიდატმა, ნინო ზაუტაშვილმა, „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„გადაცემა „რეალური სივრცე“, „საზოგადოებრივი მაუწყებლისთვის საზოგადოებასთან ურთიერთობის საუკეთესო საშუალება იყო და იმედი მაქვს, რომ ასეც იქნება. ამ ეტაპზე არანაირი ინფორმაციის დადასტურება ან უარყოფა არ შემიძლია. ეს ყველაფერი ახალი გენერალური დირექტორის და მისი მოადგილის პრეროგატივაა, რომელიც ძველ მენეჯმენტშიც იყო. მეც სულგანაბული ველოდები ორშაბათ დღეს. ეს ყველაფერი სამეურვეო საბჭოს მიმართ იქნება წარდგენილი და მათი გადაწყვეტილებაც საინტერესო იქნება.
მინდა შევახსენო ახალ ხელმძღვანელობას, რომ ზოგადად ტელევიზიებს და მათ შორის „საზოგადოებრივ მაუწყებელს“, ქმნის არა აპარატურა და კარგი სტუდიები, არამედ ამ ყველაფერს ქმნიან ადამიანები. ამიტომ ადამიანების ფაქტორი არის მთავარი, რომელიც უნდა გაითვალისწინონ. სიამოვნებით დაველოდები ორშაბათ დღეს, რომ გავარკვიოთ რა გეგმები აქვს მაუწყებელს და რა ბედი ეწევა „რეალურ სივრცეს“. რეორგანიზაციასაც აქვს თავისი მკვეთრად გაწერილი კანონები და წესები, რომლებიც აუცილებლად უნდა იყოს დაცული. ვინც დატოვებს „საზოგადოებრივ მაუწყებელს“, მათ ეს გადაწყვეტილება უნდა დაუსაბუთონ,“–განაცხადა ზაუტაშვილმა.
მანანა ღოღობერიძე
