„ყველა ის ძირითადი ეტაპი, რომელიც კანონად ქცევას ნიშნავს დასრულებულია და სამწუხაროდ ჩვენ კვლავ სუს-ი მოგვისმენს და მოგვისმენს კონსტიტუციური პრინციპების დარღვევით“. ამის შესახებ საპარლამენტო უმცირესობის მდივანმა, ფრაქცია „მოძრაობა თავისუფლებისთვის–ევროპული საქართველოს“ წევრმა, ირაკლი აბესაძემ, „რუსთავი 2“–ის ეთერში, გადაცემა „კურიერში“ საუბრისას განაცხადა.
„გასული დღეების განმავლობაში “ევროპულმა საქართველომ“ გააკეთა ყველაფერი, მათ შორის პირველი მოსმენის მაქსიმალურად დროში გახანგრძლივების კუთხით, რომ ხელისუფლებისთვის დაგვენახებინა, საზოგადოებისთვის გვეჩვენებინა ყველა ის მნიშვნელოვანი ხარვეზი, რომელიც კვლავ ანტიკონსტიტუციურს ხდის იმ კანონმდებლობას, რომელიც დღეს მიიღო ხელისუფლებამ.
ეს კანონი კვლავ შესაძლებელს ტოვებს სახელმწიფო უსაფრთხოების სამსახურმა განაგრძოს უკანონო მოსმენები. ჩვენ მივიღეთ მონაწილეობა საპარლამენტო პირველ მოსმენაში, ასევე საკომიტეტო მოსმენაში,წერილობით წარვადგინეთ ალტერნატივები. ამ ყველაფრის პასუხად პარლამენტის თავმჯდომარემ განაცხადა, რომ მზად არ არიან და საჭიროდ არ თვლიან კანონპროექტზე მუხლობრივ მსჯელობას. როგორც ჩანს სუს-ისგან მიღებული დავალება გულისხმობდა ამ კანონპროექტზე მუშაობის სწრაფად დასრულებას.თანაც ისე, რომ სუს–ის ზემოქმედების საშუალება არ შეცვლილიყო.
ბატონი გოგაშვილი, ივანიშვილის პირადი დაცვის ხელმძღვანელი იყო, ის სუს–ის ხელმძღვანელად 6 წლის ვადით აირჩიეს და იმაზე დიდხანს შეინარჩუნებს თანამდებობას, ვიდრე შესაძლოა „ქართულმა ოცნებამ“ მოახერხოს. ეს პრინციპულად მნიშვნელოვანია ივანიშვილისთვის, რომ ჰქონდეს წვდომა ფარულ მასალებზე, პირველ რიგში მისი თანაგუნდელების შესახებ. დღეს ამ პოლიტიკური დავალების შესრულებას ვუყურებდით,“–განაცხადა ირაკლი აბესაძემ.
მანანა ღოღობერიძე
