წინასწარი მონაცემებით, საქართველოში განხორციელებული პირდაპირი უცხოურიინვესტიციების მოცულობამ 2013 წლის II კვარტალში 232 მლნ. აშშ დოლარი შეადგინა, რაც ამავე წლის I კვარტალის მაჩვენებელს 3 პროცენტით, ხოლო 2012 წლის II კვარტალის მაჩვენებელს 7 პროცენტით აღემატება.
საქსტატის ინფორმაციით, რაც შეეხება წლის პირველი ნახევრის მაჩვენებელს, წინასწარი მონაცემებით პირდაპირი უცხოური ინვესტიციების მოცულობამ 2013 წლის პირველ 6 თვეში 459 მლნ. აშშ დოლარი შეადგინა, რაც 2012 წლის დაზუსტებული მონაცემების 96 პროცენტს შეადგენს.
წინასწარი მონაცემებით, 2013 წლის II კვარტალში საქართველოში პირდაპირი უცხოური ინვესტიციების შემომავალმა ნაკადებმა 480 მლნ. აშშ დოლარი შეადგინა.
2013 წლის II კვარტალში უმსხვილესი პირდაპირი უცხოური ინვესტორი ქვეყნების წილი
პროცენტულად შემდეგნაირად განაწილდა: ლუქსემბურგი 52 პროცენტი, ჩინეთი – 34 პროცენტი,
ნიდერლანდები – 28 პროცენტი. მსგავსი პროცენტული თანაფარდობა გამოწვეულია რამდენიმე ქვეყნის შემთხვევაში ინვესტორების მიმართ ვალდებულების შემცირებით.
ხოლო უმსხვილესი პირდაპირი უცხოური ინვესტორი ქვეყნების პროცენტული სტრუქტურა მთლიან შემომავალ ნაკადებში შემდეგნაირად ნაწილდება: ლუქსემბურგი 25 პროცენტი, ჩინეთი – 17 პროცენტი და ნიდერლანდები – 14 პროცენტი.
უმსხვილესი სექტორების წილმა (განხორციელებული პირდაპირი უცხოური ინვესტიციების მიხედვით) 2013 წლის II კვარტალში 96 პროცენტი შეადგინა.
ყველაზე მეტი პირდაპირი უცხოური ინვესტიცია ენერგეტიკის სექტორში განხორციელდა და 66 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 29 პროცენტია.
მეორე ადგილზე იმყოფება დამამუშავებელი მრეწველობა 59 მლნ. აშშ დოლარით, ხოლო მესამეზე – ტრანსპორტი და კავშირგაბმულობა 46 მლნ. აშშ დოლარით.
09.09.13
