მთიულეთში, სოფელ მუგუდას სასაფლაოს მიმდებარე ტერიტორიაზე მაღალი ძაბვის გადამცემი ბოძების დასადგმელად დაწყებულმა სამუშაოებმა ადგილობრივი მოსახლეობის პროტესტი და უკმაყოფილება გამოიწვია. ადგილობრივთა განცხადებით, იმ ფერდობზე, სადაც ბოძების დადაგმა იგეგმება, მცოცავი ნიადაგია და არის საშიშროება, რომ ძლიერმა ქარმა ან წვიმებმა საძირკველი გამოაცალოს. მოსახლეობა შიშობს, რომ ბავშვებს ამ საშიშროების გამო სახლიდან ვერ გამოუშვებენ. მოსახლეობის წინააღმდეგობის შესაჩერებლად ადგილზე სპეცდანიშნულების სამსახურის წარმომადგენლებიც მივიდნენ.
ამ ფაქტთან დაკავშირებით გთავაზობთ საქართველოს საპატრიარქოს განცხადებას:
დიდად ვწუხვართ იმ მღელვარების გამო, რაც ყაზბეგის რაიონსა და მთიულეთში მაღალი ძაბვის ელექტრო-გადამცემი ხაზების გაყვანას მოჰყვა. მოსახლეობის ნაწილი საპატრიარქოშიც მოვიდა და არსებული ვითარება გაგვაცნო.
ერთის მხრივ, გასაგებია სამინისტროს პოზიცია; გვესმის, რომ ქვეყანას ეკონომიკური წინსვლა სჭირდება და, როგორც ჩანს, ეს არის მთავარი მოტივი აღნიშნული ქმედებისა, მაგრამ იგივე მიზანს ემსახურება ტურიზმის განვითარებაც, რაც სახელმწიფომ თავის პრიორიტეტად გამოაცხადა.
უცხოელებს, ჩვენს კულტურასთან ერთად, ხელუხლებელი ბუნება და ეკოლოგიურად სუფთა გარემოც იზიდავთ; მთის ოჯახური ტურიზმი ერთ-ერთი სერიოზული მიმართულებაა და მას ხელი არ უნდა შეეშალოს. არადა, დასახლებულ პუნქტებთან მაღალი ძაბვის სადენების სიახლოვე ამ მხრივაც უარყოფითად იმოქმედებს.
რაც შეეხება, არსებულ დაძაბულობას, ამბობენ, რომ პროცესები მართულია. ასეც რომ იყოს, მაინც ყველაფერი უნდა გაკეთდეს, რომ გამოსავალი მოიძებნოს. ეს კი დამატებით ფინანსურ ხარჯებთან შეიძლება იყოს დაკავშირებული. მაგრამ სჯობს, გარკვეული თანხები იქნას გაღებული, ოღონდ, სადაც არის შესაძლებელი, შემხვედრი ნაბიჯები გადაიდგას და ხალხმა თანადგომა დაინახოს.
გასათვალისწინებელია ისიც, რომ ხელისუფლებამ დიდი ძალისხმევა ჩადო მთის კანონის შემუშავებასა და მის რეალიზაციაში და მოსახლეობას მაღალმთიან რეგიონებში არათუ დარჩენის, ქალაქებიდან დაბრუნების სურვილი გაუჩინა. ეს განწყობა, ეს მიღწევა არ უნდა გაუფერულდეს.”
აღნიშნული მაღალი ძაბვის ხაზი რუსეთის ენერგოსისტემას დაუკავშირდება. სამუშაოებს კომპანია “ენერგო ტრანსი” აწარმოებს. კომპანიის წარმომადგენელთა განცხადბით, მშენებარე ელექტრო სისტემა ადგილობრივ მოსახლეობას საფრთხეს არ შეუქმნის. რაც შეეხება საფლავებს, საჭიროების შემთხვევაში, ნეშტის გადასვენების ხარჯებს თავად კომპანია გაიღებს.
მარიამ ქალებაშვილი
