საქართველოს 25 მუნიციპალიტეტსა და სამ დაბაში წყალმომარაგების სამუშაოები 40 მილიონი დოლარით დაფინანსდება, – ამის შესახებ დღეს პრემიერ-მინისტრის რეზიდენციაში მთავრობის სხდომის დასრულების შემდეგ ჟურნალისტებს რეგიონული განვითარებისა და ინფრასტრუქტურის მინისტრმა, დავით ნარმანიამ განუცხადა.
მისი თქმით, საქართველოს მთავრობამ დღევანდელ სხდომაზე საქართველოსა და ევროპის საინვესტიციო ბანკს შორის გაფორმებული შეთანხმება დაამტკიცა, რომელიც 25 მუნიციპალიტეტსა და სამ დაბაში წყალმომარაგების სამუშაოების სწორედ 40 მილიონი დოლარით დაფინანსებას ითვალისწინებს. დოკუმენტი საქართველოს ფინანსთა სამინისტრომ წარმოადგინა, რომელიც აღნიშნულ თანხას მიიღებს. ამის შემდეგ კი თანხა რეგიონული განვითარებისა და ინფრასტრუქტურის სამინისტროს სათანადო პროექტების დაფინანსებისთვის გადაეცემა.
„ყველა ძირითადი პროექტი მზად გვაქვს. პირველი ეტაპისათვის ყველაზე პრობლემური მუნიციპალიტეტები და დაბები დაფინანსდება. წყალმომარაგების გაუმჯობესების სამუშაოებს იქ მომდევნო წლიდან დავიწყებთ. ეს ამ მიმართულებით ერთ-ერთი დიდი და უპრეცედენტო პროექტი იქნება. სამუშაოები ყველა მუნიციპალიტეტსა და დაბაში პარალელურად შესრულდება“, _ აღნიშნა დავით ნარმანიამ.
13.09.13
