თბილისის სახელმწიფო უნივერსიტეტის პირველკურსელებს ახალი სასწავლო წლის დაწყება ახლად არჩეულმა რექტორმა ვლადიმერ პაპავამ, განათლების მინისტრმა თამარ სანიკიძემ და სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ მიულოცეს.
როგორც სიტყვით გამოსვლისას პატრიარქმა განაცხადა, სწავლის დაწყება ფრიად მნიშვნელოვანი მოვლენაა ქვეყნისთვის. პატრიარქმა სწავლის თარიღთან დაკავშირებით ბიბლიიდან ფრაზები მოიყვანა და აღნიშნა, რომ როდესაც სამეფო ტახტზე სოლომონ მეფე ავიდა, მან უფალს შესთხოვა, მისთვის მიეცა სიბრძნე და გული გონიერი.
“როდესაც სამეფო ტახტზე სოლომანი ავიდა, მან სთხოვა უფალს მიეცა სიბრძნე და გული გონიერი. ამას გისურვებთ თქვენც, რომ ღმერთმა გახსნას თქვენი გული და გონება, რომ თქვენი გული იყოს ტაძარი სიბრძნისა. ღმერთმა ქნას, რომ დიდი სულიერება და დიდი განათლება მოგანიჭოთ თქვენ, ვინაიდან, ქვეყანას სწორედ დიდი სულიერება და დიდი გონიერება სჭირდება, რომელიც საჭიროა, როგორც თქვენთვის, ასევე ქვეყნისთვისაც”, – ბრძანა უწმინდესმა.
პირველკურსელი სტუდენტები პირველი კორპუსის წინ არიან შეკრებილი. აქვე მივიდნენ სტუდენტები ტრანსფარანტებით, რომლებიც სკანდირებენ სწავლის ხარისხი არ არის სწავლის საფასურის ადეკვატური. მათ თან პლაკატებებიც აქვთ მიტანილი წარწერით – “ნუ ატყუებთ სტუდენტებს”, “ვითხოვთ ხარისხიან განათლებას”.
პარალელურ რეჟიმში მიმდინარეობს საზეიმო ცერემონიალიც, რომლის დროსაც გამოცხადდა, რომ ერთიანი ეროვნული გამოცდების შედეგად ყველაზე მაღალქულიან სტუდენტებს კომპანია “მაგთიკომმა” გადასცა სპეციალური საჩუქრები, ნეთბუქები. საჩუქრების გარეშე არ დაუტოვებია გამომცემლობა “პალიტრა L”-ს წარჩინებული აბიტურიენტები, რომლებმაც უმაღლესი ქულები მიიღეს ერთიან ეროვნულ გამოცდებზე. მათ შორის ექვს პირველკურსელს “პალიტრა L”-ის მთავარმა რედაქტორმა, ნინო დეკანოსიძემ მაღალპოლიგრაფიული დონის წიგნები საჩუქრად გადასცა.
რაც შეეხება “მაგთიკომს”, 5-მა სტუდენტმა საჩუქრად ნეტბუქები მიიღო.
ასევე, თსუ-ის ყველა პირველკურსელს უნივერსიტეტის სიმბოლური საჩუქრები და კომპანია “მაგთიკომის” შეთავაზებით, სურვილის შემთხვევაში, უფასო სიმბარათები გადაეცემათ. აღნიშნული აქციის ფარგლებში სტუდენტებს მთელი სასწავლო წლის განმავლობაში 100 მგბაიტი, 100 სმს და 30 წუთი დაერიცხებათ.
დღეს საღამოს 18.00 საათზე სწავლის დაწყებას სტუდენტებს თბილისის მერიის საკონცერტო ორკესტრის ბენდი მიულოცავს. კონცერტი თბილისის სახელმწიფო უნივერისტეტის ყველა სტუდენტისთვის პირველი კორპუსის სააქტო დარბაზში გაიმართება.
16.09.13
