პრემიერმინისტრ გიორგი კვირიკაშვილის მოწვევით, 31 ივლისს საქართველოს 2 დღიანი ვიზიტით ამერიკის შეერთებული შტატების ვიცეპრეზიდენტი მაიკ პენსი, მეუღლესთან ერთად ეწვევა. ინფორმაციას მთავრობის ადმინისტრაცია ავრცელებს.
31 ივლისს თბილისის საერთაშორისო აეროპორტში, აშშ-ის ვიცეპრეზიდენტის დახვედრის ოფიციალური ცერემონია გაიმართება. აშშ-ის ვიცეპრეზიდენტს, მეუღლესთან და დელეგაციასთან ერთად, საქართველოს პრემიერმინისტრი ოფიციალურ ვახშამზე უმასპინძლებს.
1 აგვისტოს საქართველოს მთავრობის ადმინისტრაციაში გაიმართება პრემიერმინისტრისა და აშშ-ის ვიცეპრეზიდენტის შეხვედრა. შეხვედრის შემდეგ კი, პრესისთვის ერთობლივი განცხადებები გაკეთდება.
მაიკ პენსი სწავლების „ღირსეული პარტნიორის“ მონაწილე სამხედროებს შეხვდება. აშშ-ის ვიცეპრეზიდენტის ვიზიტი საქართველოში პირველ აგვისტოს დასრულდება.
საქართველოში ვიზიტამდე პენსი ესტონეთში ჩავიდა.
