2017 წელს ქართული ღვინის ექსპორტმა რეკორდულ მაჩვენებელს მიაღწია. სოფლის მეურნეობის მინისტრის ლევან დავითაშვილის განცხადებით, სხვადასხვა ქვეყანაში ჯამში სულ 70 მილიონი ბოთლი ქართული ღვინო გაიტანეს.
მინისტრმა ძირითად ბაზრებზეც ისაუბრა და აღნიშნა, რომ ტრადიციული ბაზრების გარდა ახალი, საინტერესო და პერსპექტიული მიმართულებებია ჩინეთის ბაზარი და ამერიკის შეერთებული შტატები, სადაც ქართული ღვინის გაყიდვების მაჩვენებელი მზარდია.
“შეგვიძლია ვთქვათ, რომ ქართული ღვინო კონკურენტუნარიანია, რადგან ბოლო წლებში ქართული ღვინის კონკურენტუნარიანობა გაიზარდა. მიუხედავად იმისა, რომ გარკვეულ პროდუქტებზე არსებობს შეზღუდვა ევროკავშირიდან, ალკოჰოლური სასმელები არ შეზღუდულა, აქ შედის ყველა ევროპული მწარმოებლის ღვინო და ასეთ კონკურენტულ გარემოში ქართული ღვინო წარმატებულია. ყოველ წელს ვაორმაგებთ ექსპორტს ჩინეთის მიმართულებით, რომელიც აბსოლუტურად ახალი ბაზარია. დღევანდელი მონაცემებით საქართველო პირველ 11 იმპორტიორ ქვეყანაშია. ათეულში ალბათ წლის ბოლომდე ვიქნებით. აქედან გამომდინარე, საკმაოდ მნიშვნელოვანი პროგრესი გვაქვს ჩინეთის მიმართულებით”,- განაცხადა დავითაშვილმა.
სოფლის მეურნეობის მინისტრი ასევე ამბობს, რომ წელს ტრადიციულ ბაზრებს დაემატა იაპონია.
“სამხრეთ-აღმოსავეთ აზიაში ასევე არის ძალიან პერსპექტიული, სტაბულური, მაღალფასიანი და მაღალხარისხზე ორიენტირებული ბაზარი. იმედია, რომ იაპონიაშიც ვიქნებით წარმატებულები, რადგან ქართული ღვინის ხარისხი მნიშვნელოვნად გაზრდილია. ამისთვის ყველაფერი გაკეთდება. კარგი მარკეტინგული გეგმაც გვაქვს. ასევე აშშ, სადაც საკმაოდ ორგინალურ ნაბიჯებს ვდგამთ იმისთვის, რომ მსოფლიოს ყველაზე დიდ ღვინის ბაზარზე ქართულმა ღვინომ დაიმკვიდროს თავი. აქ ჩვენ ზრდის საკმაოდ დიდი ტენდენცია გვაქვს”,- აღნიშნა მინისტრმა.
დავითაშვილის თთქმით, ქართული ღვინის მიმართ აღქმა რადიკალურად შესაცვლელია, ამიტომ სამი ახალი მიმართულები უკვე ტრადიციული ბაზრებისთვის საკმაოდ დიდი ალტერნატივა იქნება.
