ქართული პროდუქცია ნიუ-იორკსა და ამსტერდამში უახლოეს პერიოდში გაიგზავნება. კომპანიის წარმომადგენლის თქმით, საწყის ეტაპზე მცირე რაოდენობა გაიყიდება, სამომავლოდ კი ექსპორტის გაზრდა იგეგმება, აშშ-ში საქონელი 11 შტატში გადანაწილდება. ამის შესახებ კომპანია „გემუანის“ დირექტორმა პაატა მაჭავარიანმა „ტვ პირველზე“, გადაცემაში „საქმის კურსი“ ისაუბრა.
„ინოვაციური პროდუქტია. ეს მარტო გადამუშავებული ხილი არ არის. დაბალ ტემპერატურაზე გაყინვის შემდგ ხდება კრისტალიზაცია წყლის შემადგენლობიანი ხილის, შემდეგ დაბალი წნევით 97 % წყალი გამოდის და რჩება მშრალი ხილი. საერთაშორისო გამოფენებზე ჩვენი ინოვაციური პროდუქტიც იყო წარდგენილი. ეკონომიკის და სოფლის მეურნეობის სამინისტრო ხელს გვიწყობს გამოფენებში მონაწილეობაში, სადაც დამყარდა კონტაქტი ექსპორტისთვის.
საწყის ეტაპზე, რადგან აინტერესებთ ახალი პროდუქტის ხარისხი, მცირე რაოდენობა გავა. აშშ-ში დიდ კონტროლს ექვემდებარება კვების პროდუქცია, მითუმეტეს ხილი, ამიტომ თავიდან მცირე რაოდენობას გვიკვეთავენ.ამ დროისთვის წარმოების მოცულობა 3 ტონამდეა. ეს მცირე მოცულობაა იმის ფონზე, რომ ამ პროდუქტზე დიდი მოთხოვნაა. ადგილობრივ ბაზარზე დაახლოებით 2 კვირაში შევალთ. ამ ეტაპზე მხოლოდ ქართულ ხილზე ვმუშაობთ, თუ მოთხოვნა იქნება მოგვიწევს ეგზოტიკური ხილის იმპორტი.
ლაბორატორიული ანალიზის საფუძველზე ჩვენ ვაკეთებთ დასკვნას,რომელსაც ვუგზავნით იმპორტიორს. თუმცა საქართველოში ამ დასკვნის გაკეთება რთულია, რადგან არ გვაქვს ლაბორატორია, რომელიც საერთაშორისო დონის შესაბამის ტესტს გვიკეთებს, ამიტომ გვიწევს გერმანიაში გაგზავნა, რაც რა თქმა უნდა ხარჯებთან არის დაკავშირებული“ , – განაცხადა პაატა მაჭავარიანმა.
მანანა ღოღობერიძე
