გურამ კაშიას ქმედება უეფა-ს კამპანია „თანასწორობის თამაშის“ ნაწილი იყო – ლევან კობიაშვილი

 „„ქართული მარშის“ მომხრეები აბსოლუტურად ეწინააღმდეგებიან გამოხატვის თავისუფლებას და ხელს უწყობენ აგრესიას. არავის აქვს უფლება სხვას მისცეს მიმართულება, თუ როგორ უნდა იცხოვროს“ , – ამის შესახებ ფეხბურთის ფედერაციის პრეზიდენტმა ლევან კობიაშვილმა გადაცემა „რეაქციას“ ეთერში ისაუბრა.

„მე მხარდაჭერა გამოვხატე გურამ კაშიას მიმართ და ვეწინააღმდეგები ყველანაირ ძალადობას.აბსოლუტურად აბსურდული ბრალდებებია „ქართული მარშის“ წევრებთან შეხვედრის შესახებაც. ისინი, ვინც რაიმე ძალადობის დაგეგმვას მაბრალებენ, საერთოდ არ მინახავს შეხვედრაზე. არანაირი ფორმის შურაცხყოფაზე საუბარი არ ყოფილა, რამდენიმე წუთი ვისაუბრეთ და დავშორდით ერთმანეთს. ეს პირველი შემთხვევა არ არის,როდესაც უსაფუძვლო ბრალდებებს მიყენებენ, ადრე იძახდნენ,რომ დინამოს სტადიონთან არსებობს კლუბი,სადაც ნარკოტიკული საშუალებები იყიდება და მე ამას ხელს ვუწყობ, რაც აბსურდულია.

გურამ კაშიამ გააკეთა განმარტება, მან იცოდა რასაც აკეთებდა, ყველანაირი ფორმის ძალადობას ეწინააღმდეგება. ეს კამპანია მანამდეც არსებობდა, ეს არის ერთ-ერთი ახალი კამპანია,რომელიც უეფა-მ დაიწყო და ჰქვია „თანასწორობის თამაში“. ფეხბურთი არ არის მხოლოდ 90 წუთი და შედეგი ტაბლოზე, ეს არის სპორტი, რომელიც ადამიანებს აძლევს თავისუფლების საშუალებას. გურამ კაშია არც პირველია და არც ბოლო იქნება. ეს არის ფეხბურთის ფედერაციის პასუხისმგებლობა. ძალიან ბევრი ცნობილი ვარსკვლავი შეგვიძლია ჩამოვთავლოთ, ვისაც მსგავს აქციაში მიუღია მონაწილეობა“, – განაცხადა ლევან კობიაშვილმა.

მანანა ღოღობერიძე