თბილისში ჩატარებული ანტიტერორისტული სპეცოპერაციის, ტერორიზმის, როგორც საერთაშორისო საფრთხის შესახებ და ასევე ევროინტეგრაციის პრობლემებზე პარლამენტის დამოუკიდებელმა დეპუტატმა, საგარეო საქმეთა ყოფილმა მინისტრმა სალომე ზურაბიშვილმა საზოგადოებრივ მაუწყებელზე, გადაცემა „კვირის ინტერვიუს“ ეთერში ისაუბრა.
„პარლამენტის ნდობის ჯგუფი არის ფორმატი,სადაც უნდა იხილებოდეს მსგავსი მნიშვნელობის საკითხები. ეს ორსაფეხურიანი ფორმატი არის აუცილებელი ამ ტიპის კონფიდენციალურ ინფორმაციებზე სამუშაოდ. გამორჩეული არ ვარ, მაგრამ მაქვს გამოცდილება,რომელიც მსგავს ფორმატებს სჭირდება. არ ვიცით ვისთან ვთანამშრომლობდით,საიდან მოდიოდა ინფორმაცია, როდის დაიწყო სპეცოპერაციის დაგეგმვა.
სხვა ქვეყნების მაგალითით აუცილებელია, რომ ტექნიკურის გარდა პოლიტიკურმა პირებმაც გააკეთონ განცხადებები. მათ უნდა აიღონ თავის თავზე ინფორმაციის გაცემა, რაც საზოგადოებისთვის ბევრად მისაღებია, ვიდრე სპიკერი,რომელიც ტექნიკურ და შეზღუდულ ინფორმაციას გასცემს. ისიც არ ვიცით რა მზადდებოდა. ეს იყო ჩვენთვის პირველი გამოცდილება და საკმაოდ რთულია მისი გაძღოლა. მითუმეტეს რომ სპეციფიკურია ქართველი ხალხი, აქ ჭორები, მითქმა-მოთქმა სწრაფად ვრცელდება და ნდობა საჯარო განცხადებების მიმართ არის ნაკლები. იმის გამოცდილებაც არ გვაქვს, თუ რისი თქმა შეიძლება საჯაროდ და რისი არა, ამან გამოიწვია სიფრთხილე. ჭორები და სპეკულაცია ყველა შემთხვევაში იქნებოდა, მაგრამ მეტი პოლიტიკური ჩართულობა იყო ცალსახად აუცილებელი. დიალოგის ნაკლებობა ზოგადად არის ხელისუფლების სენი.
ვფიქრობ,რომ ევროპას ახლა ჩვენთვის არ სცალია. აქვთ განცდა, რომ ვიზალიბერალიზაციით ისედაც ბევრი გააკეთეს უკვე ჩვენთვის. პრობლემაა,რომ ვიჩემებთ თითქოს ჩვენ და უკრაინა ერთ სიბრტყეში უნდა ვიყოთ და ერთად შევიდეთ ევროსივრცეში. ეს არ უნდა იყოს დღევანდელი სტრატეგია. ბევრი რამე გვაქვს გასაკეთებელი, რომ კანონმდებლობა ევროპულ სტანდარტებზე ავაგოთ“ , – განაცხადა სალომე ზურაბიშვილმა.
მანანა ღოღობერიძე
