საქართველოს ფინანსთა მინისტრის პირველი მოადგილე გიორგი თაბუაშვილი ესპანური საინვესტიციო კომპანიების “პერფაკო გრუპისა” და “მეტრონიას” პრეზიდენტებსა და კომპანიების წარმომადგენლებს შეხვდა.
ფინანსთა სამინისტროს ინფორმაციით, კომპანიები დაინტერესებულები არიან ინვესტირებით ტურიზმის სფეროში, სასტუმროების ბიზნესითა და გასართობი ცენტრების ინდუსტრიით.
“ესპანური საინვესტიციო კომპანიების წარმომადგენლებს სურთ ინვესტირება სათამაშო და სასტუმრო ბიზნესში. მათთვის საინტერესოა ის ბიზნესგარემო, რომელიც ამ მიმართულებით არის შექმნილი ქვეყანაში. შეხვედრაზე მათ გამოთქვეს მზადყოფნა, უახლოეს მომავალში ქართველ პარტნიორებთან ერთად კონკრეტული პროექტები განახორციელონ,” – განაცხადა ფინანსთა მინისტრის მოადგილემ გიორგი თაბუაშვილმა.
კომპანია “პერფაკო გრუპის” პრეზიდენტმა ფრანცის პერესმა ფინანსთა და ეკონომიკის სამინისტროებში გამართული შეხვედრებით კმაყოფილება გამოთქვა.
“გვსურს მადლობა გადავუხადოთ ქართულ მხარეს იმ საინტერესო ინფორმაციისთვის, რომელიც ამ შეხვედრების დროს მივიღეთ. ვფიქრობთ, ეს დაგვეხმარება ჩვენს საქმიანობაში,” – განაცხადა ფრანცის პერესმა.
ფინანსთა მინისტრის პირველმა მოადგილემ სტუმრებს გააცნო ქვეყნის ეკონომიკაში არსებული მდგომარეობა, ბიზნესგარემო, საგადასახადო პოლიტიკა, მათ შორის, სათამაშო და სასტუმრო ბიზნესში მოქმედი საგადასახადო რეგულაციები.
23.09.13
