Kote.ge ახალი ქართული სტრატაპია, რომლის მიზანია სახლის შეძენა ყველასათვის ხელმისაწვდომი გახადოს, როგორც ფასით, ასევე ექსპლუატაციაში მოყვანის სიმარტივით. ეს არის ენერგოეფექტური სახლი, რომლის შეძენა, მისი დაშლა და გადაადგილება მარტივ პროცედურებთანაა დაკავშირებული. „თბილისი თაიმსს“ კომპანიის ერთ-ერთი დამფუძნებელი ლევან ტყემალაძე ესაუბრა Kote.ge-ის შექმნისა და სამომავლო გეგმების შესახებ.
ჩვენს მკითხველს რომ მოუყვეთ, როგორ გაჩნდა Kote.ge-ის შექმნის იდეა?
– ყოველთვის ვცდილობდი, ისეთი საქმე მეპოვნა, სადაც საკუთარი თავის რეალიზებას მოვახდენდი. თავდაპირველად, მინდოდა ჩემთვის შემექნა მსგავსი კოტეჯის ტიპის სახლი, თუმცა შემდეგ აღმოჩნდა, რომ ჩემ გარდა, კიდევ ბევრ ადამიანს სჭირდებოდა პატარა, პრაქტიკული და მყუდრო სახლი, რომლის გადაადგილების საშუალება ექნებოდა ნებისმიერ ადგილას.
რამდენი ხანია რაც Kote.ge არსებობს და როგორ შეხვდა მომხმარებელი ამ საიხლეს?
– ზაფხულიდან დავიწყეთ აქტიურად მუშაობა და გაყიდვა ჩვენ მიერ შექმნილი კოტეჯების. მიუხედავად იმისა, რომ გვქონდა მოლოდინი მომხმარებლის დაინტერესებისა და მოწონების, ამ ყველაფერმა მოლოდინს გადააჭარბა. ძალიან დიდი ინტერესით შეხვდნენ ამ სიახლეს, რაც დიდი მოტივაცია იყო ჩვენთვისაც. იმის გათვალისწინებით, რომ სტარტაპია მუდმივად ვვითარდებით და იცვლის სახეს. ნელ-ნელა ვსწავლობთ, როგორც სახლის დამზადების ტექნოლოგიებს, ასევე ონლაინ ტექნოლოგიებს, თუ როგორ შეიძლება ძალიან სასარგებლო იყოს ამ ყველაფრის სინთეზი ერთად. ეს ყველაფერი კი იძლევა იმის საშუალებას რომ გამარტივდეს სახლის შეძენის პროცესი და ხელმისაწვდომობა.
ძირითადად რა სახის მასალისგან მზადდება კოტეჯები და რამდენად მოსახერხებელია მათი მარტივად გადაადგილება?
– ბაზარზე კოტეჯების კუთხით ძალიან დიდი არჩევანია. საკმაოდ ბევრი კომპანია მუშაობს ამ კუთხით და სიახლეებსა და ახალ ტექნოლოგიებს სთავაზობენ მომხმარებლებს. ჩვენ შევისწავლეთ ყველა ის პროცედურა და ტექნოლოგია, რომელთა საშუალებით შესაძლებელია სახლის აშენება. გადავწყვიტეთ, ამ ეტაპზე ხის პანელების საშუალებით შეგვექმნა კოტეჯები, რომლებიც გვაძლევს საშუალებას სახლი იყოს მყარი, გამძლე, გაუძლოს მექანიკურ დატვირთვას და იყოს ამტანი კლიმატური პირობების შესაბამისად. კოტეჯების გადაადგილება საკმაოდ მარტივი და მოსახერხებელია, როგორც აწყობილ მდგომარეობაში, ასევე დაშლის დროსაც. რაც შეეხება სიმყარეს, მყარია და უძლებს ნებისმიერ კლიმატურ პირობებს.
რითი ხართ გამორჩეულები და რამდენად მოთხოვნადია კოტეჯები ბაზარზე?
– ძირითადი დაინტერესება ბიზნეს სექტორიდან მოდის, რომლთათვისაც კოტეჯების შეძენა მნიშვნელოვანი შემოსავლის წყაროა. თუ დავუბრუნდებით ტექნოლოგიურ განვითარებას, შეგვიძლია ჩვენ სრულიად უფასოდ მივცეთ დაინტერესებულ პირს სახლი და მისგან დამოუკიდებლად, სმარტ ტექნოლოგიების დახმარებით, ჩვენვე უზრუნველვყოთ ამ კოტეჯის გაქირავება იმ დროს როცა მფლობელი არ იქნება ადგილზე.
როგორია kote.ge-ის ფასები და რამდენად ხელმისაწვდომია ?
– კოტეჯის ფასებს რაც შეეხება, იმის გათვალისწინებით რომ ჯერ კიდევ განვითარების ეტაპზე ვართ, ფასებზე არ ვსაუბრობთ. 9 კვადრატული მეტრი კოტეჯი, რომელიც უკვე გაყიდვაშია მისი საშუალო ფასი 6 000 ლარია. მართალია, იგივე ფართის კონტეინერების შეძენა უფრო იაფია, თუმცა, ჩვენ ვიგებთ მოცულობით. ამ ტიპის კოტეჯში გაცილებით მეტი სივრცეა.
როგორ შეძელით იდეის განვითარება და რა სირთულეები შეგხვდათ დასაწყისში?
– ყველაზე დიდი სირთულე, არის დამოკიდებულება ამ საქმის მიმართ. მართალია მომხმარებელს ძალიან მოსწონს ჩვენი სახლები, თუმცა ყოველთვის არიან ადამიანები, რომლებსაც მუდმივად აქვთ რაღაც პრობლემა კოტეჯების მიმართ და არ მოსწონთ რაღაც დეტალები. ჩვენი კონცეფციიდან გამომდინარე, გვინდა, თითოეული მათგანის ინტერესები დავაკმაყოფილოთ. ეს ყველაფერი კი ძალიან დიდ სირთულეებთან არის დაკავშირებული, რომელიც მოითხოვს მუდმივ ძიებას და ახალი შესაძლებლობებისა და საშუალებების აღმოჩენას.
როგორია Kote.ge-ის სამომავლო გეგმები?
– სამომავლოდ ვაპირებთ არსებული ტექნოლოგიები გამოვიყენოთ ისე, რომ სახლის შეძენა ყველასათვის მარტივი და ხელმისაწვდომი იყოს. იმის გათვალისწინებით რომ ჩვენთვის ტექნოლოგიების მაქსიმალურად გამოყენება პრიორიტეტულია, გვინდა რომ მაქსიმალურად შევუწყოთ ხელი განახლებადი ენერგიის გამოყენებას.
მარიამ ლეკიაშვილი
