„ჩირიფრუტი“ ტყლაპისა და ჩირის ოჯახური ბიზნესია, რომელიც ოთხი წლის წინ გამოჩნდა ქართულ ბაზარზე. კომპანიას თბილისში აქვს მცირე ზომის საწარმო, სადაც ხდება ხილის გამოშრობა და შეფუთვა. „თბილისი თაიმსთან“ საუბრისას ბრენდის ერთ-ერთმა დამფუძნებელმა სოფიო ჯიქიამ „ჩირიფრუტის შექმნისა და სამომავლო გეგმების შესახებ ისაუბრა.
ჩვენს მკითხველს რომ მოუყვეთ, საიდან გაგიჩნდათ „ჩირიფრუტის“ შექმნის იდეა?
– რამდენიმე წლის წინ, მამაჩემმა გამოგვიგზავნა ჩირი, რომელსაც ძალიან კარგი გემო და არომატი ჰქონდა. იმდენად საინტერესო პროდუქტი იყო,რომ მივხვდით, შეგვეძლო მრავალფეროვანი გაგვეხადა და საზოგადოებასაც შეძლებოდა მისი დაგემოვნება. როდესაც, ვიფიქრეთ, ყველაფრისთვის სერიოზული სახე მიგვეცა-შეგვეტანა მარკეტებში, მივხვდით,რომ კიდევ გვჭირდებოდა განვითარება. ამიტომ, დასაწყისიდან დღემდე ბრენდი მუდმივად ვითარდება. შევქმენით საკუთარი რეცეპტები, ტექნოლოგია, შეფუთვები, გავდიოდით სხვადასხვა ტრენინგს, სულ ვცდილობთ დავხვეწოთ პროდუქცია, რათა მომხმარებლისთვის უფრო მეტად საინტერესო და მიმზიდველი გახდეს.
როგორ შეხვდა მომხმარებელი სიახლეს?
– მომხმარებელი პირველივე დღიდან დაინტერესდა ჩვენი პროდუქციით. გვიზიარებდნენ საინტერესო იდეებს, თუ რისი დამატება და განვითარება შეგვეძლო. ჩვენც ეს ყველაფერი დადებითად გამოვიყენეთ და დავნერგეთ ჩვენს საწარმოში. დღითიდღე იზრდება მოთხოვნა ჩვენს პროდუქციაზე, სულ ცოტა ხნის წინ გავხსენით ჩვენი კუთხე „გალერეა თბილისში“. ჩვენთვის რაც ყველაზე მთავარია, მომხმარებელი დადებითად ხვდება ნებისნიერ სიახლეს.
რითი ხართ გამორჩეულები, რა არის თქვენი მთავარი განმასხვავებელი ნიშა?
– პირველი რიგში, პროდუქტის მრავალფეროვნებით, გვაქვს ფორთოხალი, სტაფილო, გოგრის ტყლაპი. ასევე ვფიქრობ, გამოვირჩევით ვიზუალით. ნებისმიერ პროდუქტზე ძალიან ბევრს ვფიქრობთ, თუ როგორი ფორმა მივცეთ, როგორ დავხვეწოთ და შევცვალოთ. მაგალითად, „ჩირიფრუტის“ ტყლაპების შეძენა დაჭრილი, მცირე ზომის ფორმებითაა შესაძლებელი, რაც სასიამოვნოს და კომფორტულს ხდის მის მირთმევას. გვაქვს, ასევე საინტერესო შეფუთვა და გამოვირჩევით განსხვავებული გემოთიც.
ძირითადად რა სახის ხილისგან არის დამზადებული „ჩირიფრუტის“ პროდუქცია?
– გვაქვს როგორც ქართული, ასევე საზღვარგარეთიდან შემოტანილი ხილისგან დამზადებული ჩირები. ვაშრობთ და ვამზადებთ ბანანისა და ანანასის ჩირებს და ვფიქრობთ, რომ ეს „ჩირიფრუტის“ ერთ-ერთი საუკეთესო პროდუქციაა. გარდა ამისა, ვამზადებთ ალუბლის, ვაშლის ჩირებს, გვაქვს შერეული ხილის ტყლაპი, ხურმა, მარწყვის ჩირი და ტყლაპი, ქლიავი და გვაქვს ასევე შოკოლადში ამოვლებული ჩირები.
სად შეიძლება „ჩირიფრუტის“ შეძენა და როგორია ფასები?
– თბილისის მასშტაბით ჩვენი პროდუქციის შეძენა შესაძლებელია რამდენიმე მაღაზიასა და კაფეში, ასევე „გალერეა თბილისში“ და ჩვენს საწარმოში. რაც შეეხება ფასებს, იმასთან შედარებით რაც თავად პროდუქციის დამზადება ჯდება-ჩირს მაღალი ხარისხის ხილისგან ვაწარმოებთ, ვფიქრობ, ფასები საკმაოდ დაბალია.
როგორია „ჩირიფრუტის“ სამომავლო გეგმები?
– სამომავლოდ ვგეგმავთ პროდუქციის ექსპორტზე გატანას, რადგან ყოველდღე გვიკავშირდებიან სხადასხვა ქვეყნიდან და გვთხოვენ, გავაგზავნოთ ჩირი. თუმცა, ამ ეტაზე ვგეგმავთ ქართულ ბაზარზე დავიმკვიდროთ თავი, გავფართოვდეთ და უახლოეს მომავალში აუცილებლად გავიტანოთ „ჩირიფრუტი“ ექსპორტზე.
მარიამ ლეკიაშვილი
