მის გაკეთებულ ქვევრში ჯერ არავინ გაჭედილა, რომ გამოსაყვანად „ლავუაზიეს კანონის“ გამოყენება დასჭირვებოდათ. არც იმხელა ქვევრებს აკეთებს პატრონს მისი გავსება რომ გაუჭირდეს. იცის რომ მისი გაკეთებული ქვევრი ძალიან კარგ ღვინოს დაამზადებს და საკუთრი საქმით ძალიან ამაყობს. „თბილისი თაიმსთან“ საუბრისას მეთუნე ზაზა კბილაშვილი ჰყვება, რომ ეს ის ტრადიციაა, რომელიც ჩვენს ქვეყანას კიდევ უფრო განსაკუთრებულს ხდის.
თქვენზე რომ მოუყვეთ ჩვენს მკითხველს, რამდენი ხანი რაც ამ საქმით ხართ დაკავებული?
– ქვევრების კეთება შთამომავლობით გადმოგვეცემა, თაობიდან თაობას. მე ვარ მეოთხე თაობა, ვინც ამ ტრადიციას აგრძელებს. პირველი ქვევრი რვა წლის ასაკში გავაკეთე და მას შემდეგ მუდმივად ვქმნი სხვადასხვა ზომის ქვევრებს. საკმაოდ რთულია ქვევრზე მუაობის სფეციფიკა, თიხის სწორად შერჩევა და დამუშავება, ამიტომ მის სწავლას დიდი დრო და ენერგია სჭირდება. ეს საქმიანობა მომავლაში ალბათ ჩემს შილებსაც გადაეცემა და ძალიან მიხარია, რომ ვიცავთ ამ საუკუნოვან ტრადიციას.
როგორია მოთხოვნა და ვინ არის ძირითადი სეგმენტი, რომელიც ქვევრის შეძენითაა დაინტერესებული?
– გარდა მსხვილი მარნებისა, ინდივიდუალური მომხმარებლებიც მოდიან , ყიდულობენ ქვევრებს და შემდეგ თავად აკეთებენ სახლში მცირე მარნებს. რა თქმა უნდა, რაც დარწმუნდნენ რომ ქვევრი არის უნიკალური ჭურჭელი ღვინის დასამზადებლად, ამ კუთხით მოთხოვნა გაზრდილია. აღსანიშნავია ისიც, რომ მხოლოდ ქვევრის ღვინოს გააჩნია ის სამკურნალო თვისებები, რომლებიც სასარგებლოა ორგანიზმისთვის. ყოველივე ამის გამო, წინა წლებთან შედარებით ქვევრებზე მოთხოვნა გაზრდილია.
სად ხდება თიხის მოპოვება და როგორია ხდება მისი სწორად შერჩევა?
– თიხის მოპოვება ადგილობრივად ხდება, კახეთში. თუმცა, გასათვალისწინებელია ის ფაქტი, რომ მოიპოვება რამდენიმე სახეობის თიხა. მხოლოდ კარგ და გამოცდილ ოსტატს შეუძლია ამოიცნოს ის თიხა, რომელიც ქვევრის დამზადებისთვის გამოდგება, წყალი არ უნდა გაატაროს, ყინვამ არ უნდა დაშალოს. თიხას უკვე კარგად ვიცნობ,წლებია ჩემი ხელები გრძნობს იმ ძალას, რაც თავს განსაკუთრებულად გაგრძნობინებს. საამაყოა ის, რომ ჩემმა გაკეთებულმა ქვევრმა საუკუნეებს უნდა გაუძლოს.
რას ურჩევდით დამწყებ მეთნეებს?
– ქვევრის დამუშავების სწავლას დიდი დრო სჭირდება. უპირველეს ყოვლისა, ყოველი დამწყები მეთუნე კარგად უნდა ერკვეოდეს თავად თიხის სპეციფიკაში, რომელი თიხა გამოიყენოს, როგორ გაასუფთაოს და შემდეგ როგორ მოზილოს. თუმცა ოსტატი რომ გახდე,ამისთვის ნიჭი უნდა გქონდეს, მხოლოდ დრო და გამოცდილება ვერაფერს გიშველის. თითოეულმა უნდა გაიზაროს ის, რომ ღვინის ხარისხი იწყება ყურძნიდან და ქვევრიდან. ვენახი – ღვინო – ქვევრი – ეს ხომ ერთი დიდი ჯაჭვია! სწორედ ეს ფაქტორები განსაზღვრავს რამდენად მაღალი ხარისხის ღვინოს მივიღებთ.
როგორია თქვენი სამომავლო გეგმები, თავადაც ხომ არ აპირებთ ღვინის ჩამოსხმას და რეალიზებას?
– ჩვენი ოჯახი ქვევრში ღვინოს ოდითგანვე აყენებდა. მეც ვაყენებ ღვინოს ქვევრში და ვფიქრობ, ეს არცთუ ცუდად გამომდის. შარშან საზოგადოებას ჩემი ღვინო წარვუდგინე და მიხარია, რომ მან დიდი მოწონება დაიმსახურა. მივიღე გადაწყვეტილება, რომ უახლოეს მომავალში გავზარდო წარმოება და დავიწყებ ჩამოსხმას და რეალიზაციას.
მარიამ ლეკიაშვილი
