უცხოელებზე ბინადრობის ნებართვებთან დაკავშირებით კანონში ცვლილებები შედის. საკითხი მთავრობის სხდომაზე განიხილება და მას მინისტრთა კაბინეტის წევრებს თეა წულუკიანი გააცნობს.
სხდომის დაწყებამდე კი, ცვლილებები გიორგი კვირიკაშვილმა შეაფასა.
“პრაქტიკაში არის შემთხვევები როდესაც საქართველოში კანონიერი საფუძვლის გარეშე მყოფი უცხოელი ფორმალურად ითხოვს თავშესაფარს და პარალელურად ცდილობს ბინადრობის ნებართვის მიღებას, ან ითხოვს ქვეყნიდან გასვლის ვალდებულების გადავადებას სასამართლოში მისი მონაწილეობით მიმდინარე საქმის წარმოების მოტივით.
ამის შემდეგ სერვისების განვითარების სააგენტოს მიმართავს ბინადრობის ნებართვის მოთხოვნით, აგრეთვე იღებს მოკლევადიან C კატეგორიის ვიზებს და შემდეგ ითხოვს ბინადრობის ნებართვას.
საკანონმდებლო ცვლილების თანახმად, იცვლება შემდეგი რეგულაცია: საქართველოში მუდმივი ცხოვრების ნებართვის მოსაპოვებლად ბოლო 10 წლის განმავლობაში უნდა ცხოვრობდეს.
დროებითი ბინადრობის ნებართვის ვადა კი 12 წლამდე იზრდება – დღეს მისი მაქსიმალური ხანგრძლივობა 6 წელია, ამასთან თუ უცხო ქვეყნის მოქალაქეს არ აქვს საქართველოში მუდმივად დარჩენის მოტივი, 6 წლის გასვლის შემდეგ, ის კვლავ მიიღებს დროებით და არა მუდმივ ნებართვას“– განაცხადა საქართველოს პრემიერ მინისტრმა.
ნინო ზარიძე
