დედაქალაქის მერმა, კახა კალაძემ ბრიტანეთში მოღვაწე ქართველ მომღერალს, ქეთი მელუას „საპატიო თბილისელის“ სიგელი და თბილისის სიმბოლური გასაღები გადასცა.
ქეთი მელუა მსმენელის წინაშე, დედაქალაქის მერიის პროექტის „თბილისის ცის ქვეშ“ ფარგლებში, წარდგა. კონცერტი ევროპის მოედანზე გაიმართა და მასზე დასწრება თავისუფალი იყო. მსოფლიო მასშტაბის პოპ-ვარსკვლავმა თავის ბრიტანულ ბენდთან ერთად, ძველი და ახალი ჰიტები შეასრულა.
კონცერტის მიმდინარეობისას სცენაზე დედაქალაქის მერი კახა კალაძე და მერის მოადგილე სოფიო ხუნწარია ავიდნენ, რომლებმაც ქეთი მელუას დაბადების დღე მიულოცეს.
დედაქალაქის მერმა ბრიტანეთში მოღვაწე ქართველ მომღერალს საქართველოში სტუმრობისა და თბილისის მერიის პროექტში მონაწილეობისთვის მადლობა კიდევ ერთხელ გადაუხადა.
„ძალიან მიხარია, რომ ამდენი ადამიანი შეიკრიბა. მადლობა ყველას მობრძანებისთვის, ქეთის დაფასებისთვის. მეამაყება რომ ასეთი თანამემამულე – მსოფლიო დონის ვარსკვლავი გვყავს. ვიცი, თუ რა შრომის ფასად შეიძლება, უცხო ქვეყანაში წარმატებას მიაღწიო. ქეთი, ყველას გვეამაყები და გვიხარია, რომ ჩვენთან ერთად იმყოფები. ჩვენ გადავწყვიტეთ, რომ „საპატიო თბილისელის“ წოდება მოგანიჭოთ“, – მიმართა დედაქალაქის მერმა ქეთი მელუას.
