2018 წლის 12 ოქტომბერს, საქართველოს საგარეო საქმეთა მინისტრი, დავით ზალკალიანი საგარეო უწყების ლევან მიქელაძის სახელობის სასწავლო-კვლევით ინსტიტუტში შეხვედრას გამართავს საქართველოში მოქმედი არასამთავრობო და კვლევითი ორგანიზაციების წარმომადგენლებთან, რომელთაც გააცნობს ევროკავშირში ინტეგრაციის საგზაო რუკის (ღOADMAP2EU)კონცეფციას და დოკუმენტის შემუშავების მიზნით მინდინარე საქმიანობას.
დოკუმენტი წარმოადგენს საქართველოს მთავრობის ინიციატივას და ემსახურება ევროკავშირთან თანამშრომლობის ყველა არსებული მექანიზმისა და რეფორმების კონსოლიდაციას. საგზაო რუკის იმპლემენტაცია ხელს შეუწყობს ასოცირების შეთანხმების მიღმა არსებული ინტეგრაციის შესაძლებლობების გამოვლენასა და შესაბამისი ნაბიჯების დაგეგმვას.
სამინისტროში დაგეგმილი შეხვედრა ემსახურება დოკუმენტის ირგვლივ არასამთავრობო და კვლევითი ორგანიზაციების მოსაზრებებისა და რეკომენდაციების გაზიარებას. საქართველო-ევროკავშირის ურთიერთობები ბოლო წლების განმავლობაში საკმაოდ დინამიურად ვითარდება. ევროკავშირის სხვადასხვა ინსტიტუციების მიერ მაღალი შეფასება ეძლევა საქართველოს მხრიდან ევროპული ინტეგრაციის მიმართულებით გადადგმულ ნაბიჯებს და მთელი რიგი მიმართულებებით მიღწეული პროგრესს.
