პრეზიდენტ გიორგი მარგველაშვილისთვის საქართველოში რაიმე სახის ნარკოტიკული საშუალების წარმოება მიუღებელია. ამის შესახებ მან დღეს, პრეზიდენტის ადმინსიტრაციაში გამართულ პრესკონფერენციაზე თქვა.
გიორგი მარგველაშვილის განცხადებით, საზოგადოებამ იცის, თუ როგორი დამოკიდებულება აქვს მას ნარკომომხმარებლების მიმართ.
“არასოდეს დამიმალავს, რომ ნარკომომხმარებლების მიმართ ლოიალური ვარ. არაერთი ნარკომომხმარებელი შემიწყალებია და არ მიმაჩნია, რომ ისინი ციხეში უნდა ისხდნენ, როგორც კრიმინალები. ამ ფონზე სრულიად მიუღებელია ნარკოტიკული საშუალებების წარმოება საქართველოში. მიუღებელია ორი მთავარი პოზიციიდან გამომდინარე: თუკი ჩვენ გავხდებით ნარკოტიკების მწარმოებელი ქვეყანა, ჩვენ ნამდვილად ვერ გავაკონტროლებთ ეფექტურად ნარკოტიკების გავრცელებას და ბევრად მეტი ადამიანი გახდება ამ სენის მსხვერპლი. მეორე ფაქტორი საგარეო პოლიტიკურია – საქართველო, როგორც ნარკოტიკების მწარმოებელი ქვეყანა, ეს არ არის ის იმიჯი, რისთვისაც ჩვენ ვუყვარვართ, გვაფასებენ, რის გამოც მხარს გვიჭერენ და გვიცავენ. ეს არის ძალიან რთული იმიჯი, რომელსაც შეიძლება მოჰყვეს რთული შედეგები. საქართველო ვერ იქნება ვერც მარიხუანის და ვერც სხვა ნარკოტიკული საშუალების მწარმოებელი ქვეყანა”, – განაცხადა გიორგი მარგველაშვილმა.
პარლამენტმა კანაფის კონტროლის შესახებ კანონპროექტის განხილვა ორი თვით გადადო. ნაციონალებმა თქვეს, რომ განხილვის გადადება საპრეზიდენტო არჩევნებს უკავშირდება, რაც უმრავლესობამ უარჰყო. ნაციონალური მოძრაობის პოზიციას “გირჩის” პოლიტიკური ლიდერი ზურაბ ჯაფარიძე გამოეხმაურა. ჯაფარიძის თქმით, ნაცმოძრაობის პოზიცია ფარისევლურია, რადგან მათთან ერთად არაერთხელ მოუწევია კანაფი.
კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია.
შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.
30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.
