ეუთოს საპარლამენტო ასამბლეის პრეზიდენტმა, საქართველოს პარლამენტის წევრმა, გიგი წერეთელმა მოლდოვის დედაქალაქში ოფიციალური შეხვედრები გამართა. ხელისუფლების პირველ პირებთან შეხვედრების დროს, გიგი წერეთელმა ხაზი გაუსვა გამჭვირვალე და სამართლიანი არჩევნების ჩატარების მნიშვნელობას და აღნიშნა, რომ ეუთოს საპარლამენტო ასამბლეისა და სხვა საერთაშორისო დამკვირვებლების მიერ, 24 თებერვალს მოლდოვის საპარლამენტო არჩევნების აქტიური მონიტორინგი ჩატარდება.
„ეს არჩევნები გადამწყვეტი მომენტია ქვეყნის ცხოვრებაში. გასული წლის სასამართლოს გადაწყვეტილებამ, კიშინიოვის მერის არჩევნების გაუქმებასთან დაკავშირებით, აშკარად უარყოფითად იმოქმედა ხალხის ნდობაზე სახელმწიფო ინსტიტუტებისადმი და საერთაშორისო დონეზე შეშფოთება გამოიწვია. ამიტომ მაღალი საერთაშორისო სტანდარტით ამ არჩევნების ჩატარება ორმაგად მნიშვნელოვანია და ყველას მოვუწოდებ ხელი შეუწყონ ამ პროცესს. არჩევნების შემდგომ უნდა შეიქმნას კიდევ უფრო ხელშემწყობი პირობები დნესტრისპირეთის პრობლემის მოგვარებისათვის და ქვეყნის სწრაფი ეკონომიკური განვითარებისათვის”, – განაცხადა გიგი წერეთელმა.
ეუთოს საპარლამენტო ასამბლეის პრეზიდენტმა კიშინიოვში შეხვედრები გამართა ქვეყნის პრეზიდენტ იგორ დოდონთან, პარლამენტის თავმჯდომარე ანდრიან კანდუსთან, პრემიერ-მინისტრ პაველ ფილიპთან, საგარეო საქმეთა მინისტრ ტუდორ ულიანოვსკისთან და საპარლამენტო ლიდერებთან. ორმხრივ შეხვედრებზე საუბარი შეეხო საქართველო-მოლდოვას ორმხრივი ურთიერთობების საკითხებს და ევროინტეგრაციის პროცესში. თანამშრომლობის პერსპექტივებს ეუთოს საპარლამენტო ასამბლეის პრეზიდენტი ასევე შეხვდა მოლდოვას დემოკრატიული პარტიის თავმჯდომარეს ვლად პლოხოტნიუკს და მთავარი ოპოზიციური პარტიების ხელმძღვანელებს. დისკუსიები შედგა სამოქალაქო საზოგადოების, საერთაშორისო ორგანიზაციების და დიპლომატიური კორპუსის წარმომადგენლებთან.