როგორც დღეს გამართულ პრესკონფერენციაზე ღვინის ეროვნული სააგენტოს ხელმძღვანელმა ლევან დავითაშვილმა განაცხადა, პირველი აქციზური მარკები უკვე გაიცა და გამოიგზავნა საქართველოში, დანარჩენი უკვე დამოკიდებულია ლოჯისტიკასა და იმაზე, თუ რამდენად სწრაფად მოამზადებს ქართველი მწარმოებელი თავის პროდუქციას ექსპორტზე გასატანად.

მისივე თქმით, პროცედურული საკითხებში ქართული ღვინის რუსეთის ბაზარზე გასატანად უკვე მოგვარებულია.

„ჩვენი მხრიდან სერტიფიცირების პროცესი მაქსიმალურად სწრაფად განხორციელდება და სწრაფად გავცემთ სერტიფიკატებს. ეს მაქსიმუმ სამდღიანი პროცედურაა. ჩვენ ველით, რომ იქით კვირაში შეიძლება პირველი პარტიები დაიძრას რუსეთისკენ. მომავალ კვირაში კი ჟურნალისტებს შეეძლებათ იმ კომპანიების გადაღება, რომლებიც გავლენ რუსულ ბაზარზე“, _ განაცხადა ლევან დავითაშვილმა.

მისივე თქმით, რუსეთის ბაზარზე გასვლა შეუძლია 70-მდე კომპანიას და პირველ ეტაპზე რუსეთში 1 მილიონზე მეტი ბოთლი ღვინის გატანა იგეგმება.

როგორც დავითაშვილმა აღნიშნა, საქართველო რუსეთის გარდა, სხვა ქვეყნებშიც გეგმავს ღვინის ექსპორტს, თუმცა ჯერჯერობით აქცენტი კეთდება რუსულ ბაზარზე, რადგან იქ ქართული ღვინო ცნობადია და მის პოპულარიზაციას დიდი ძალისხმევა არ სჭირდება.

06.06.13

The post ქართული ღვინო რუსულ ბაზარზე მომავალი კვირიდან გავა appeared first on TTimes.GE.