ისტორია იმისა, რომ ადამიანმა საკუთარ სურვილებსა და შესაძლებლობებზე უარი არ უნდა თქვა. ისტორია იმისა, რომ რეალურია, გქონდეს სასურველი ოჯახი და, პარალელურად, იყო წარმატებული ქალი საკუთარ საქმიანობაში. ისტორია იმისა, რომ სამყაროში უსაზღვრო რაღაც არის სასწავლი.
ია თავდიშვილი ამ ისტორიების გმირია. საკუთარი წარმატებებითა და წინსვლით თავადვე გაოგნებული, ის „თბილისი თაიმსს“ თავისი ნაბიჯების შესახებ უყვება.
რა გზა გაიარეთ, სანამ საკუთარ ბიზნესს წამოიწყებდით?
ბავშვობიდან ძალიან აქტიური ვიყავი, ძალიან მიყვარდა კითხვა. დავდიოდი უამრავ წრეზე,სადაც ბოლომდე ვიხარჯებოდი და მაქსიმალურ შედეგს ვაღწევდი ხოლმე. ვიყავი ნოჩი ჟურნალისტი გაზეთ „აბრეშუმის გზაში“ და სამტრედიის მე-11-ე საჯარო სკოლასთან არსებული პრესკლუბის _ „მომავლის შვილების“ ხელმძღვანელი. ვწერდი ლექსებს, რომლებსაც ლიტერატურულ საღამოებზე ვკითხულობდი. ვცეკვავდი ქორეოგრაფიულ ანსამბლ „შევარდენში“. მოვიპოვეთ გრან-პრი სიმღერის კონკურსზე- „ახალი ხმა“. 2003- 2004 წლებში ვიყავი ფრენბურთის გუნდის წარმატებული თავდამსხმელი. 1999 წელს, ფოთში გამართულ სილამაზის კონკურსზე გავხდი „მის ფაზისი 99“ და ა.შ.
გაამართლა თქვენმა იდეამ საბავშვო ატელიესთან დაკავშირებით?
2017 წელს ჭრა-კერვის კურსები წარმატებით გავიარე. მოვიპოვე გრანტი „აწარმოე საქართველოშის“ პროექტის ფარგლებში და 2018 წელს ქ. ოზურგეთში გავხსენი პირველი სალონური ტიპის საბავშვო ატელიე. ჩვენი შრომისმოყვარეობითა და ხარისხიანი პროდუქციით სახელი მალევე გავითქვით თუმცა, ბიზნესის გვერდი პროფილის გვერდზე მქონდა გახსნილი, რადგან facebook-ზე არსებული ბიზნესის გვერდს ვერაფერი გავუგე.
მახსოვს, „ფეისბუქის“ ბიზნესის გვერდზე გადაბარგება როგორ გამიჭირდა. თავიდან, კლიენტები ვერ მაგნებდნენ და შეწუხებულები მირეკავდნენ_ „ხომ არ დახურე ატელიეო?“ მაშინ ძალიან დაბნეული ვიყავი, ახლა კი მივიჩნევ, რომ ეს ყველაზე ჭკვიანური და მომგებიანი ნაბიჯი იყო ჩემი ბიზნესისათვის.
რა იყო მომდევნო წარმატება?
პროექტის ფარგლებში მომივიდა ახალი ბიზნესპროექტის იდეა, რომელიც 1 თვეში განვახორციელე და გავხსენი სამოდელო სტუდია, შევქმენი მეორე გვერდიც და ჩავატარე მესამე წარმატებული ჩვენება, რის შემდეგაც თბილისში მიგვიწვიეს.
პროექტის ფარგლებში, ავაწყვე wordpress-ის ვებსაიტი ჩემი ბიზნესისთვის, სადაც აქტიურად ვათავსებდი სხვადასხვა ინფორმაციასა თუ განცხადების შესავსებ ფორმას სტუდიაში ჩარიცხვის მსურველთათვის. ვისწავლე HTML_ ში მუშაობა, CSS, ფლაგინების ჩაშენება, SEO. ტრენინგების დროს მოწოდებულ მასალებთან ერთად, ვეძებდი და ვპოულობდი უამრავ საინტერესო ვიდეოგაკვეთილს, რომელსაც ჩემი გუნდის წევრებს აქტიურად ვუზიარებდი. ეს გახდა ჩემი უსაყვარლესი საქმიანობა, რომლის კეთების დროსაც ისე გადიოდა დრო, რომ ვერც კი ვხვდებოდი, როგორ შემომათენდებოდა ხოლმე.
დადგა ბედნიერი დღე, როცა გავიგე, რომ 40 რჩეულ გოგონაში მოვხვდი და მითხრეს, რომ სტაჟირება უნდა გამევლო! უზომოდ გამიმართლა, რომ მოვხვდი უცხო ენების შემსწავლელი ყველაზე დიდ ონლაინპლატფორმის შემქმნელთა პრსპექტიულ გუნდში, როგორიც Lingwing-ია. ისინი ძალიან დამეხმარნენ, რომ საკუთარი შესაძლებლობები 100%-ით გამომეყენებინა. დედაჩემთან- დიზაინერ მანია ვაშაკიძესთან ერთად, შევკერე ჩვენი ონლაინმასწავლებლის, პოლიგლოტი თუთიყუშის, ლინგოს ფორმა, მოვაწყვე პიარაქცია,სადაც 3 ცალი 3 თვიანი უფასო კურსი გავათამაშე იქ მყოფ ადამიანებზე. ლინგომ ბავშვებთან ერთად იცეკვა და ბოლოს, შევასრულე ლინგოს ჰიტი, რომლის ტექსტიც თავად დავწერე. ეს იყო საუკეთესო და პოზიტიური დღე.
წარმოიდგინეთ, როგორ გამეხარდებოდა, როცა ერთ-ერთმა დამფუძნებელმა- ბატონმა ვატო ველიაშვილმა მითხრა, რომ ჩვენი თანამშრომლობა გაგრძელდებოდა და მე ოფიციალურად გავხდი ამ დიდი და კრეატიული ოჯახის წევრი! ეს ჩემი მეორე დიდი გამარჯვება იყო. მესამე დიდი სიხარული სტაჟირების დასრულების შემდეგ, ქულათა რაოდენობის მიხედვით გამოქვეყნებული სიის შედეგად განვიცადე! ვერ წარმოიდგენთ, როგორი ამაყი და ბედნიერი ვიყავი, როცა ჩემი სახელი სიის თავში ამოვიკითხე!!! მოკლედ, დიდი მოტივაციით და ამაღლებული განწყობით გავეშურეთ თბილისისკენ, სადაც გასაუბრების შედეგად,სამიტზე წამსვლელი გოგონების ოთხეული უნდა შეერჩიათ. გასაუბრებიდან გამოსული, დიდი მოთმინებით ველოდი შედეგებს, თუმცა, რა შედეგებიც უნდა დადებულიყო, მე უზომოდ მადლიერი ვიყავი,ვარ და ვიქნებოდი პროექტის, რომელმაც ჩემი ცხოვრება 100 %-ით უკეთესობისაკენ შეცვალა.
რა შედეგით დასრულდა გასაუბრება?
შევიტყვე, რომ მე წარმატებით გავიარე გასაუბრება და მივემგზავები ლისაბონში, ეს იყო სრული შოკი. სიტყვებით ვერ გადმოვცემ იმ ემოციას, რაც მაშინ განვიცადე! თან ვტიროდი, თან ვიცინოდი! არ მჯეროდა, რომ ეს ჩემს თავს ხდებოდა.
რას ისურვებდით ქალებისთვის, რომლებსაც აქვთ რესურსი, აკეთონ საყვარელი საქმე?
მინდა, მოტივაცია ავუმაღლო და თავდაჯერებულობა შევმატო ჩემისთანა გოგონებს, რომელთაც ხელი აქვთ ჩაქნეული თავიანთ სურვილებსა და ოცნებებზე. რომ სწავლა, არასდროს არის გვიანი, რომ რაც ძლიერ გსურს და მთელი ძალით იბრძვი მიზნის მისაღწევად, აუცილებლად მიაღწევ!
რას გეგმავთ სამომავლოდ?
მინდა გითხრათ, რომ არ ვჩერდები და მთელი ცხოვრების მანძილზე ვაპირებ ჩემი ცოდნის გაღრმავებასა და დახვეწას. ვაპირებ, შევისწავლო ანდროიდის პროგრამირება და app_ების შექმნა ანდროიდისთვის. ასევე, ძალიან მიყვარს უცხო ენები, ვსაუბრობ 3 ენაზე- ინგლისურად, რუსულად და ბერძნულად. ვაპირებ, შევისწავლო ესპანური და იტალიური.
ასევე, ძალიან მალე, ქ. ოზურგეთში, გავხსნით Lingwing_ უცხო ენების შემსწავლელ პირველ ცენტრს, სადაც ადამიანები, ასაკის შეუზღუდავად, შეისწავლიან უცხო ენებს თანამედროვე, საინტერესო და ინოვაციური მეთოდებით.
ავტორი: მარიამ ტიელიძე
