დღეს მსოფლიო მოსახლეობის უდიდესი ნაწილი დროს მხოლოდ საკუთარ სახლში ატარებს. ქუჩები დაცარიელებულია, ბევრი პროცესი შეჩერებულია და ავტოტრანსპორტიც ძალიან ცოტა მოძრაობს. საგანგებო მდგომარეობის კვალდაკვალ, საინტერესოა, როგორ მდგომარეობაშია ჩვენს ქვეყანაში ატმოსფერო? რა გავლენას ახდენს მიმდინარე პროცესები ჰაერის სისუფთავის ხარისხზე? აღნიშნულ თემებზე „თბილისი თაიმსს“ ეკოლოგი, კახა ბახტაძე ესაუბრა.
ზოგადად, საქართველოში ჰაერის დაბინძურებაზე რა ახდენს გავლენას?
პირველ ყოვლისა, ეს არის ტრანსპორტი, რომელიც თბილისში ძალიან დიდი რაოდენობით არის თავმოყრილი. აქედან ბევრი ავტოტრანსპორტი მოძველებულია და სწორედ ეს არის ერთ-ერთო მნიშვნელოვანი კონტრიბუტორი ჰაერის დაბინძურებისა. ასევე, ატმოსფეროზე უარყოფითად მოქმედებს საწარმოების დიდი რაოდენობა, რაც თავმოყრილია დედაქალაქში, ასევე, რუსთავში, რომელიც თბილისთან ახლოს მდებარეობს. ძალიან მნიშვნელოვანია აქტიური მშენებლობები და მშენებლობიდან მომდინარე მტვრის ნაწილაკები.
თუმცა, ამ ეტაპზე, ვიცით, რომ ყველა ეს აქტივობა შეჩერებულია, შესაბამისად, შემცირებულია ჰაერის დაბინძურების ხარისხი.
მიმდინარე მოვლენების ჭრილში, რამდენად არის გაუმჯობესებული ჰაერის ხარისხი?
ადგილობრივი და საერთაშორისო ინდიკატორების მიხედვით, დაბინძურება შემცირებულია. არსებული მდგომარეობა დედაქალაქის სისუფთავეზე დადებითად აისახება. ზოგადად, ქვეყანას რაც შეეხება, შეგვიძლია ვთქვათ, რომ ურბანულ ტერიტორიებზე ჰაერის დაბინძურება ძალიან მაღალი იყო.
რამდენად რეალურია, რომ საგანგებო მდგომარეობის დასრულების შემდეგ არსებული ვითარება შენარჩუნდება?
ეს რთული სათქმელია იმიტომ, რომ, ალბათ, ნელ-ნელა აღდგება ის ეკონომიკური აქტივობები, იგივე – ტრანსპორტის მოძრაობა, რაც ახლა შეჩერებულია. თუმცა, რეალურად, რასაც ვხედავთ არის ის, რომ საგანგებო მდგომარეობა ერთიანად არ მოიხსნება. პროცესი ნელ-ნელა აღდგება და წარმოებაც ეტაპობრივად გაგრძელდება. დაბინძურების ხარისხიც ნაბიჯ-ნაბიჯ მოიმატებს.
თუმცა ვიცით, რომ გარკვეული რეფორმები მიმდინარეობს საზოგადოებრივ ტრანსპორტთან დაკავშირებით. შესაძლოა, ახალი ავტობუსები კიდევ დაემატოს. ეს, სამომავლოდ, დადებითად იმოქმედებს. ყველაფერი დამოკიდებულია იმ გადაწყვეტილებებზე, რასაც მთავრობა მიიღებს. ვიცით, რომ გარკვეული ეკონიმიკური სტიმულირება დაკავშირებულია გარემოსდაცვითი მოთხოვნების შერბილებასთან. თუ მთავრობა გადაწყვეტს, რომ შეარბილოს რაღაც მოთხოვნები წარმოებასთან დაკავშირებით, რა თქმა უნდა, ეს უარყოფითად აისახება ბუნებრივ გარემოსა და ჰაერის დაბინძურებაზე.
მოპოვებითი საწარმოების გარკვეულმა ნაწილმა მიიღო მუშაობის გაგრძელების ნებართვა. იგივე, „არემჯი“, რომელმაც მიიღო შესაბამისი ნებართვა და მასთანაც დაკავშირებული იყო ჰაერისა და ნიადაგის დაბინძურება. ჩვენი ქვეყანა, მნიშვნელოვანწილად, დამოკიდებულია ბუნებრივი რესურსების მოპოვებასა და გამოყენებაზე. ეს, რა თქმა უნდა, საფრთხეს უქმნის ატმოსფეროს დაბინძურებას.
ავტორი: მარიამ ტიელიძე
