“ადამიანებს, რომლებსაც თანხები აქვთ გადახდილი და უკვე წლების განმავლობაში ელოდებიან საკუთარ ბინებს, ჩვენ მაქსიმალურად დავეხმარებით. ჩვენი დღეს აქ შეკრების მიზანი ყველამ ძალიან კარგად ვიცით, პრემიერმა ისაუბრა ვრცლად, თუ რამდენად მნიშვნელოვანია დეველოპერული, სამშენებლო მიმართულების ხელშეწყობა. ჩვენ ძალიან რთული პერიოდი გამოვიარეთ, არა მხოლოდ ჩვენ, ზოგადად, მთელი მსოფლიო ძალიან რთულ ვითარებაში იმყოფებოდა”, – ამის შესახებ თბილისის მერმა, კახა კალაძემ დეველოპერებისთვის ანტიკრიზისული გეგმის პრეზენტაციაზე განაცხადა.
ამასთან, მერმა საზოგადოებას თხოვნით კიდევ ერთხელ მიმართა და მას შეახსენა, რომ მაქსიმალურად გამოიჩინონ სიფრთხილე და გაითვალისწინონ ყველა ის რეკომენდაცია და მოთხოვნა, რაც მოდის დარგის სპეციალისტების მხრიდან.
“არ უნდა გავუთამამდეთ ჩვენ არსებულ მდგომარეობას, რადგან საფრთხე მაინც არსებობს იმისა, რომ ვითარება კიდევ გართულდეს და დაიძაბოს”, – განაცხადა კახა კალაძემ.
