საქართველოს პრემიერ-მინისტრი გიორგი გახარია ფინანსთა სამინისტროს, ეროვნულ ბანკსა და მთავრობის ადმინისტრაციის ეკონომიკურ გუნდს ერთობლივი მუშაობისთვის მადლობას უხდის.
ამის შესახებ პრემიერ-მინისტრმა, გიორგი გახარიამ მთავრობის ადმინისტრაციაში, უწყებათაშორის საკოორდინაციო საბჭოსთან არსებული ეკონომიკური ჯგუფის სხდომაზე განაცხადა, რომელზეც ანტიკრიზისული ბიუჯეტის პრეზენტაცია გაიმართა.
„მინდა, მადლობა გადავუხადო ფინანსთა სამინისტროს, ეროვნულ ბანკს, მთავრობის ადმინისტრაციის ეკონომიკურ გუნდს, ერთობლივი მუშაობისთვის, პირველ რიგში, ქვეყნის მაკროეკონომიკური სტაბილურობის შესანარჩუნებლად, როგორც ფისკალური, ასევე მონეტარული მიმართულებით. ეს იყო უკიდურესად მნიშვნელოვანი, კოორდინირებული მუშაობა ჩვენს საერთაშორისო პარტნიორებთან, დონორებთან. ამის შედეგი იყო, როდესაც პირველებმა დავასრულეთ საერთაშორისო სავალუტო ფონდთან მოლაპარაკებები და ქვეყნის მაკროეკონომიკურ სტაბილურობას არც ერთი დღე არაფერი არ დამუქრებია. ეს არის ამ ხალხის დამსახურება. აშკარად ჩანს, რომ ანტიკრიზისული ბიუჯეტი არის სისტემური მიდგომის შედეგი. აქ გააზრებულია ყველაფერი, დათვლილია თითოეული რისკი, როგორც დროში, ისევე იმ რისკების და რეალობის გათვალისწინებით, როდესაც პროგნოზირებადობის ხარისხი არის ძალიან დაბალი“, – განაცხადა გიორგი გახარიამ.
ამასთან, პრემიერმა ეპიდემიოლოგიურმდგომარეობასთან დაკავშირებით თითოეულ მოქალაქეს სიფრთხილისკენ მოუწოდა, ასევე მოუწოდა ყველას, საქართველოში დაისვენონ.
„მინდა, კიდევ ერთხელ დავუბრუნდე ეპიდემიოლოგიურ მდგომარეობას და თითოეულ ჩვენს მოქალაქეს მოვუწოდო უფრო მეტი სიფრთხილისკენ. დღევანდელი დღე აჩვენებს, რომ ჩვენ არაფრისგან დაზღვეული არ ვართ. ჩვენი უპირველესი ვალდებულებაა მეტი სიფრთხილე, უნდა გავუფრთხილდეთ ერთმანეთს და, რა თქმა უნდა, ჩვენ ყველამ ერთად, ახლა ისეთი სეზონია, უნდა გავუფრთხილდეთ ჩვენს ქართულ ტურიზმს. თითოეულ თქვენგანს მოვუწოდებ, ვიმოგზაუროთ და დავისვენოთ საქართველოში. ეს იქნება ყველაზე დიდი მხარდაჭერა დღეს, ამ წელს ჩვენი ეკონომიკისთვის და ტურიზმისთვის“, – განაცხადა გიორგი გახარიამ.
