საქართველოს ისტორია საინტერესოა და ძალზე მრავალფეროვანი. სხვადასხვა მიმართულებით, ის დღემდე აოცებს როგორც უცხოელებს, ისე – თავად ქართველებს. ზუსტადაც რომ საოცარია, როგორ შთაბეჭდილებასაც იწვევს ჩვენი ქვეყნის წარსული და მისი არსებობა ქართველების რეალობასა და ყოველდღიურობაში.
ბევრი სხვა დეტალის მსგავსად, ქართულ ორნამენტებს განსაკუთრებული, საკუთარ დიზაინში ჩაქსოვილი ისტორია, ამბები, შინაარსი აქვს. გარდა ამისა, ძალიან ლამაზი და დახვეწილია. ისინი დღემდე ძალიან საინტერესოა.
“იგრიკა” არცთუ ისე დიდი ხანია, რაც ნამუშევრებს სწორედ ქართული ორნამენტების ხაზით ქმნის. ნამუშევრებსაც საკუთარი მნიშვნელობა აქვს და ის თითოეულ შემთხვევაში განსაკუთრებულია.
“თბილისი თაიმსს” კომპანიის წარმომადგენლები, გრიგოლ დალაქიშვილი და ბაია ლომსაძე ესაუბრნენ.
რამდენი ხანია, რაც დაფუძნდით და რა მიზნით?
დაახლოებით, ერთი წელია, რაც მე და ჩემი მეუღლე ,,იგრიკას” პროექტზე ვმუშაობთ.
ჩვენი მიზანია, მოვიძიოთ და ახლებური ინტერპრეტაციით გავაცნოთ საზოგადოებას ქართული კულტურული მემკვიდრეობა ორნამენტებისა თუ მისტიკური სიმბოლოების სახით. გვინდა, ჩვენი საგანძური ყოველდღიურობას მოვარგოთ – როგორც ძველად, ისე თანამედროვეობაში გამოვიყენოთ ორნამენტები ინტერიერის დეკორში.
უფრო კონკრეტულად, რას საქმიანობთ?
ვამზადებთ ხელნაკეთ საბეჭდავებს სხვადასხვა მასალისაგან, ვიყენებთ გერმანულ და იტალიურ ტექსტილის საღებავებს. ვბეჭდავთ ტილოს ქსოვილზე სხვადასხვა ტექნიკით, სრული ფერით ან ფერთა ისეთი შერევით, რომელიც ხავსისებურ ეფექტს იძლევა, შედეგად – ვიღებთ უნიკალურ ანაბეჭდს.
ამჟამად რამდენიმე პროდუქტზე ვმუშაობთ, ესენია: ხელნაკეთი სუფრები, ჩანთები, ხელსახოცები, დეკორატიული ბალიშები. წიგნის მოყვარულებისთვის ვამზადებთ საბეჭდავებს კერძო ბიბლიოთეკისთვის ინიციალების უნიკალური გრაფიკული გამოსახულებით, ძირითადად – ვიყენებთ ასომთავრულ ანბანს.
ასევე, ,,იფანთან’’ ერთად, ვამზადებთ დეკორატიულ ხის დაფებს ქართული ორნამენტული ჭრებით. გარდა ამისა, ვიწყებთ კერამიკის სტუდია ,,ესტიასთან” თანამშრომლობას და მალე ახალი პროდუქტი დაგვემატება.
რა შინაარსის, ინფორმაციების მატარებელია თქვენი ნამუშევრები?
,,იგრიკას” პროდუქტი თემატურადაა დაყოფილი, თითოეულ სუფრას თავისი ამბავი აქვს. მომხმარებლებისთვის ყველაზე საყვარელი დეკორი ,,მთვარის მცველია” – ასე შევარქვით მხრებზე ხმლებასხმულ ფიგურას, რომელიც ძვ.წ. მეორე ათასწლეულში არმაზის ღვთაების სიმბოლოს განასახიერბდა, მის გარშემო მნათობების ერთ-ერთი უძველესი გრაფიკული გამოსახულებებია, რაც მთლიანობაში ზეციური სამყაროს მეტაფორაა.
რატომ „იგრიკა“?
,,იგრიკა’’ ძვ. ქართულად აპრილს ნიშნავს, ჩვენი ისტორია კი აპრილში დაიწყო, გავიცანით ერთმანეთი და საფუძველი ჩაეყარა ჩვენს პროექტს.
და ბოლოს, რას გვეტყვით, რით არის გამორჩეული ქართული ორნამენტები?
ქართული ორნამენტების სიმბოლური მნიშვნელობა მრავალფეროვანია, მისტიკურია, უმეტესობას თანამედროვეობაში დაკარგული აქვს შინაარსი, მაგრამ იძლევა ინეტრპრეტაციის საშუალებას, თითქოს – ჩვენს გენეტიკურ კოდში დევს მათი გაშიფვრის გასაღები. მათი ისტორია გამორჩეულია, უძველესი ეპოქებიდან მოყოლებული მრავალმხრივ გაშლილია სხვადასხვა მასალაში საქართველოს მთელ ტერიტორიაზე. ძველად ორნამენტების გამოსახვა საპატიო საქმედ ითვლებოდა, სწამდათ – რომ ეს მაგიური ნიშნები იცავდნენ კერას. ხშირად გვწერენ, რომ ჩვენი დეკორი სახლისთვის მყუდრო და თბილ გარემოს ქმნის, განწყობას ცვლის, რაც ჩვენთვის ძალიან ფასეულია.
მასალა მოამზადა : მარიამ ტიელიძე
