ჯერ მხოლოდ 16 წლის არის, თუმცა, მისი ცხოვრება და ყოველდღიურობა განსაკუთრებულად საინტერესოა და მრავალფეროვანი. ის ჩოხოსანია – პატრიარქის ჩოხოსანი. სწორედ ჩოხაა ის სამოსი, რომელიც მასში, უკვე ადრეული ასაკიდანვე, განსაკუთრებულ ემოციებსა და შეგრძნებებს იწვევს.
თორნიკე თოდრია ქართული პოეზიის დიდი გულშემატკივარია, ლექსებს ის განსაკუთრებულად კითხულობს და, ამ მხრივ, ძალიან წარმატებულიც არის. “თბილისი თაიმსი” მის პერსონას გთავაზობთ.
საინტერესოა, რომ ქართული ტრადიციული სამოსით შემოსილი კითხულობ ლექსებს – რას ნიშნავს შენთვის ჩოხა?
ჩოხა არის ჩემთვის სულის სამოსი. ბავშვობიდან მიყვარდა ჩოხის ჩაცმა და ყოველთვის მინდოდა, რომ პატრიარქის ჩოხოსანი გავმხდარიყავი, რისთვისაც დიდი მადლობა ბატონ ზვიად სეხნიაშვილს. ჩოხა ჩემთვის ისტორიაა. მისი ჩაცმისას ვგრძნობ, რომ სისხლი ძარღვებში მიდუღს, მიწაზე მყარად ვდგავარ და ვემსახურები ჩემს დედა ეკლესიას, ჩვენს პატრიარქს. მის გვერდით ყოფნა არის ჩემთვის უდიდესი მადლი და პატივი. როდესაც ლექსს ვკითხულობ ჩოხით, ეს კიდევ უფრო მეტ ძალასა და ენერგიას მაძლევს, რადგან ჩოხა ჩემს წინაპრებთან მაკავშირებს, იგი არის ქართული სულის გამოძახილი.
ლექსების კითხვის შესახებ გვესაუბრე – როგორია მომზადების პროცესი?
ლექსის მომზადების პროცესში ყოველთვის ვმუშაობ ჩემს თავზე და ვცდილობ, ჩავწვდე ლექსის შინაარსს, რადგან არა მარტო სიტყვებსა და სტროფებში, გამოტოვებულ ადგილებშიც არის დედა აზრი ჩადებული, ამის შემდეგ კი გადმოვცე იგი ინტონაციითა და გრძნობებით, რადგან ლექსის თითოეული ტაეპი გულიდან უნდა ამოდიოდეს.
უფრო კონკრეტულად. რა სახის აქტივობებში იღებ მონაწილეობას?
გამოვდივარ სხვადასხვა პოეზიის საღამოზე, ასევე, ვიღებ მონაწილეობას საქველმოქმედო საღამოებსა და კონკურსებში.
ამ მხრივ, რას მიიჩნევ შენს ყველაზე დიდ წარმატებად?
ყველა ჩემი გამოსვლა და ყველა ღონისძიება ჩემთვის დიდი წარმატება და წინგადადგმული ნაბიჯია, რადგან თითოეულიდან ვიღებ მაყურებლის ოვაციებსა და დიდი სიყვარულს, რაც წარმატებაზე მეტია ჩემთვის. ეს ის არის, რისთვისაც მე ვშრომობ დაუღალავად, რათა ჩემი თითოეული გამოსვლით მივანიჭოთ სიამოვნება მაყურებელს.
მხოლოდ თანამედროვე ლექსებს კითხულობ?
თანამედროვე პოეტების ლექსებებთან ერთად, ვკითხულობ ასევე ჩვენი ბუმბერაზი და კლასიკოსი პოეტების ლექსებს.
მასალა მოამზადა : მარიამ ტიელიძემ
