საქართველოს ეროვნულმა ბანკმა, შპს „პ ენდ ლ გრუპ“ – ის ვალუტის გადამცვლელ ორ პუნქტს რეგისტრაცია გაუუქმა. მიზეზი აღნიშნული პუნქტების მხრიდან იმ ვალდებულებების შეუსრულებლობა გახდა, რომელიც ეროვნულმა ბანკმა სავალუტო პუნქტებს ფულის გათეთრების მონიტორინგის პროცესის ადეკვატური წარმართვისა და მომხმარებელთა უფლებების სათანადოდ დაცვის მიზნით დაუწესა.
როგორც „თბილისი თაიმსს“ ეროვნული ბანკიდან აცნობეს, შპს „პ ენდ ლ გრუპ“ – ის სავალუტო ჯიხურები, რომლებიც დედაქალაქის ცენტრალურ ნაწილში მდებარეობს, არაერთხელ იყო მომხმარებელთა უკმაყოფილების მიზეზი ვალუტის გადაცვლის ოპერაციაზე წინასწარი გაფრთხილების გარეშე საკომისიო გადასახადის დაკისრების გამო. ეროვნული ბანკის რეგულაციის მიხედვით, ვალუტის გადამცვლელი პუნქტი ვალდებულია მომსახურების საკომისიოს (ასეთის არსებობის შემთხვევაში) ოდენობის შესახებ ინფორმაცია განათავსოს თვალსაჩინო ადგილას – სალაროსთან და ვალუტის ყიდვა–გაყიდვის კურსის თითოეულ მაჩვენებელთან. მიუხედავად არაერთგზის გაფრთხილებისა, „პ ენდ ლ გრუპ“ – ის მფლობელთა მხრიდან მუდმივად ჰქონდა ადგილი მომხმარებლის შეცდომაში შეყვანას და წესების დარღვევას.
მართალია, საქართველოში მოქმედი კანონმდებლობა არ ზღუდავს ვალუტის გადამცვლელი პუნქტის მიერ საკომისიოს დაწესების უფლებას ნაღდი ფულით ვალუტის გადაცვლის ოპერაციის წარმოებისას. მიუხედავად ამისა, „ვალუტის გადამცვლელი პუნქტების რეგისტრაციისა და რეგულირების წესი“ პირდაპირ ავალდებულებს პუნქტის მეპატრონეს სათანადოდ მოახდინოს ვალუტის გადაცვლის ოპერაციისას მომხმარებლის ინფორმირება საკომისიოს დაწესების შესახებ.
30.10.13
