LCG – ლოიალ კაპიტალ გრუპი მთავრობის მიერ ინიცირებული პროექტის „Check In Georgia” მთავარი პარტნიორია.
13 მაისს, დინამო არენაზე, საქართველოს კულტურისა და ძეგლთა დაცვის მინისტრმა მიხეილ გიორგაძემ და კომპანია LCG-ის ვიცე-პრეზიდენტმა მინდია გადაევმა ხელი მოაწერეს თანამშრომლობის მემორანდუმს.
მიხეილ გიორგაძე:
„როგორც იცით „Check In Georgia“-ს ფარგლებში 20 კომპანია შემოგვიერთდა; არ გამოვრიცხავთ, რომ ამ თვალსაზრისით პარტნიორების მატება კიდევ უფრო იქნება. მადლობელი ვარ თითოეული ამ კომპანიის, მათი წარმომადგენლების; როგორც აღვნიშნე ჩვენი მოლოდინი იმასთან დაკავშირებით, რომ ეს პროექტი ნამდვილად საინტერესო და მნიშვნელოვანია კერძო სექტორისთვის, გამართლდა. ამაში დარწმუნებული ვიყავით სწორედ იმიტომ, რომ ძალიან პრაგმატულად არის ეს გათვლილი. როგორც პრემიერმა თქვა, ეს ბევრად უფრო ბიზნეს-პროექტია, ვიდრე კულტურული და შესაბამისად მადლობელი ვარ ამ კომპანიების, რომ ის სარგებელი, რაც აღნიშნულმა პროექტმა როგორც ქვეყანას, ასევე ბიზნესმენებს შეიძლება მოუტანოს, კარგად გაიაზრეს და მხარი დაგვიჭირეს. განსაკუთრებული მადლობა მინდა გადავუხადო LCG ჯგუფს, იმის გამო, რომ ის ერთ-ერთი პირველი გამოეხმაურა ჩვენს შეთავაზებას; ის პირველი დაუდგა მხარში ამ პროექტს და სწორედ ასეთი მსხვილი მოთამაშის მაგალითს ბევრმა მიბაძა. დიდ მადლობას ვუხდი ბატონ მინდიას და მთელ კომპანიას, რომ მყისიერად გამოეხმაურა ჩვენ მოწოდებას. დარწმუნებული ვარ, კიდევ არაერთი კომპანია შემოგვიერთდება. დიდ წარმატებას ვუსურვებ LCG-ის და ყველა იმ კომპანიას, ვინც ჩართულია ამ პროექტში.“
მინდია გადაევი:
„ჩვენთვის დიდი პატივია ვიყოთ ასეთი შესანიშნავი ღონისძიების მთავარი პარტნიორები. ჩვენს ჯგუფს გააჩნია მსგავსი ღონისძიებების ორგანიზების გამოცდილება და ძალიან კარგად ვიცით რა ეკონომიკური ეფექტი მოაქვს ამას ქვეყნისათვის. სხვაგვარად შეუძლებელია ჩვენი ქვეყნის თანამედროვე კულტურულ რუკაზე დატანა და შეუძლებელია ტურისტების მოზიდვა. ჩვენი ჯგუფი, როგორც ერთ-ერთი აქტიური მოთამაშე ტურისტულ სექტორში, ვთვლით რომ ეს არის სწორედ ის ღონისძიებები, რომელსაც ყურადღება უნდა მიექცეს. ჩვენ პირველები ვიყავით, ვინც გამოვეხმაურეთ ამ ინიციატივას და მოვუწოდებ დანარჩენ მსხვილ კომპანიებს, ვისაც შესაძლებლობა აქვს, ასევე მხარში დაუდგეს კულტურის სამინისტროს და მხარი დაუჭიროს „Check In Georgia”-ს; ვთვლით, რომ ეს არის თითოეული კომპანიისთვის, რომელიც ჩართულია ტურისტულ ბიზნესში, ძალიან მნიშვნელოვანი შედეგი. ამ შედეგს ჩვენ უახლოეს თვეებში ჩვენს მაკროეკონომიკაზეც განვიცდით. ასე რომ, ეს არის ძალიან სწორი გადაწყვეტილება, რომელსაც ჩვენ ვუჭერთ მხარს და მომავალშიც ვეცდებით, რომ მსგავს ღონისძიებებში მივიღოთ მონაწილეობა.“
ამ ეტაპზე პროექტს „Check In Georgia“ უკვე შემოუერთდა საქართველოში მოქმედი 20-ზე მეტი ბიზნესსექტორის წარმომადგენელი; მათ შორისაა – ლოიალ კაპიტალ გრუპი, საქართველოს ბანკი, თიბისი, მეტრო, სოკარი, ვისოლი, თეგეტა მოტორსი, VTB ბანკი,ბლექსი ჯგუფი, შილდა, T&R დისტრიბუცია, განათლების, მეცნიერების და ტექნოლოგიების ფონდი, ომეგა, პროგრეს ბანკი, West Invest, ბორჯომი, საქართველოს ინდუსტრიული ჯგუფი, რუსალოს, გალფი, ატლსაგლობალი, აიჯი მოლი.
შემუშავებულია სპეციალური საპარტნიორო პაკეტები, რომელიც კომპანიებს საშუალებას აძლევს, პროექტის ფარგლებში, მთელი ქვეყნის მასშტაბით, 19 ქალაქში დაგეგმილ 150-ზე მეტ კულტურულ ღონისძიებაზე წარმოჩინდნენ, როგორც „Check In Georgia“-ს პარტნიორები; მომხმარებელს შესთავაზონ საინტერესო მარკეტინგული ინიციატივები. კომპანიების პოზიციონირება მოხდება დაგეგმილი სხვადასხვა მარკეტინგული აქტივობისას, ამასთან, პროდუქტის მწარმოებელი, თუ მიმწოდებელი კომპანიები ღონისძიებებზე წარმოდგენილი იქნებიან საკუთარი პროდუქციით.
აღნიშნული კომპანიების მხრიდან საპარტნიორო პაკეტების სანაცვლოდ მიღებული მთლიანი შემოსავალი დაახლოებით 6 000 000 ლარს შეადგენს. ამასთან, მხოლოდ 3 კონცერტზე დასასწრები ბილეთების გაყიდვიდან შემოსავალმა შეადგინა 2 მილიონი ლარი.
როგორც ტურიზმის ეროვნული ადმინისტრაციის მონაცემები ცხადყოფს, ტურისტების მხრიდან დიდია ინტერესი ჩვენი ქვეყნის მიმართ; ბოლო თვის მაჩვენებლებით, უცხოელი მოგზაურების/ტურისტების რიცხვი, წინა წლის ანალოგიურ პერიოდთან შედარებით, 20% პროცენტით არის გაზრდილი.
„Check In Georgia“ არის კულტურული პროექტი, რომელიც ქვეყანას მნიშვნელოვან ეკონომიკურ სარგებელს, მოსახლეობას კი, მეტ შემოსავალს მოუტანს.
