დღეს ადამიანები მივისწრაფვით სიმარტივისკენ, გართობისა და სიამოვნებისკენ. ამასთან, რაც უფრო ახალია იდეა, მით უფრო საინტერესო ხდება ჩვენი ყოველდღიურობა. კრეატიული ადამიანები გვთავაზობენ მოქმედებებს, რომლებიც ჩვენს ცხოვრებას მრავალფეროვანს ხდის.
ვაჩე ვაჩეიშვილი და დათო ცხადიაშვილი მეგობრები არიან. სტარტაპი “მახათი” სწორედ მათი იდეით დაარსდა. დღესდღეობით სტარტაპი ორ თამაშს მოიცავს – “მახათსა” და “სასმისს”. ჯერ მხოლოდ ერთი წელია, რაც მათი ბიზნესი ქართულ ბაზარზე არსებობს. თუმცა, იმდენად სახალისოა, რომ უკვე ბევრი გულშემატკივარი და მომხმარებელი ჰყავს.
“მახათის” სპეციფიკა ასეთია – ის 87 შავი და 313 თეთრი კარტისგან შედგება. შავ კარტებზე წინადადებები გამოტოვებული სიტყვებითწერია, თეთრები კი, მათ ავსებს. მოთამაშეებს შეუძლიათ, უამრავი კომბინაცია შეადგინონ. თითოეულ რაუნდში ყველაზე სასაცილოს ავტორი იმარჯვებს. კარტები მორგებულია ქართულ იუმორსა და ყოველდღიურობაზე.
მეორე თამაშისთვის, “სასმისისთვის” აუცილებელი კომპონენტია ალკოჰოლი და გულისხმობს შემდეგს – საჭიროა 4-15 ადამიანი. თამაში 4 კატეგორიას მოიცავს, ესენი: სმამილუია, ფლირტი, გაცნობა, ვინ ვინ არის.
დეტალურად, რას გულისხმობს თქვენი ბიზნესი?
ჩვენი ბიზნესი გულისხმობს ქართულ იუმორზე, რეალობასა და ყოველდღიურობაზე მორგებული სამაგიდო თამაშების შექმნას, რომლებიც ყველას გაუხალისებს ცხოვრებას. სამომავლოდ კი ბევრი სხვა სახის თამაშის გამოშვებასაც ვგეგმავთ.
რატომ გადაწყვიტეთ, რომ შეგექმნათ ეს კონკრეტული თამაშები?
ვნახეთ, რომ საქართველოში მსგავსი გასართობი საშუალება არ არსებობდა და გადავწყვიტეთ, ჩვენს ხელში აგვეღო ეს საქმე. ვინაიდან კარგი გამოხმაურება მოჰყვა, აქტიურად გავაგრძელეთ.
რა იგულისხმება იმაში, რომ საქართველოზეა მორგებული თქვენი საქმიანობა?
პირველ ყოვლისა, ორივე თამაში საქართველოშია წარმოებული. იუმორი, ლექსიკა და სპეციფიკა ქართული რეალობიდანაა აღებული და, შესაბამისად, მომხამარებელთან უფრო ახლოა.
მასალა მოამზადა : მარიამ ტიელიძემ
