ბიზნესი – რომელიც გამორჩეულად საინტერესოა. ალბათ, ყველა ჩვენგან უფიქრია, რამდენად ძვირფასია ბებია და რამდენად საჭიროა მისი უნარები. ხელსაქმე მათთვის განსაკუთრებული “ატრიბუტია”, რის გამოც ჩვენ ბებიები კიდევ უფრო მეტად გვიყვარს – ისინი ქმნიან გარემოს, რომელიც იდეალური და უნაკლოა.
“ბებიას” არცთუ ისე დიდი ხანია, რაც არსებობს. მას არსებობის საკუთარი ისტორია, მიზეზები და მიზნები აქვს.
ის მომხმარებელს სთავაზობს ხელით ნაქსოვ, 100%-ით ნატურალურ, მაღალი ხარისხის ქუდებს, რომლებიც ბებიების ხელითაა მოქსოვილი.
“თბილისი თაიმსის” შეკითხვებს გიორგი ნოზაძე, კომპანია „ბებიას“ დამფუძნებელი პასუხობს.
როდის გაჩნდა იდეა, დაარსებულიყო „ბებიას“?
იდეა გაჩნდა 4-5 წლის წინ, როდესაც დავკარგე ჩემთვის ძალიან საყვარელი, ბებიას მოქსოვილი ქუდი. ბებიამ, სამწუხაროდ, ახლის მოქსოვა ვეღარ შეძლო, მალე კი გარდამეცვალა. მაშინ მივხვდი, რამდენად ძვირფასი იყო ბებიას მოქსოვილი და მივხვდი, რომ სხვა ბებიებსაც შეეძლოთ იმავე სითბოს ჩაქსოვა ქუდებში და ჩვენი ბავშვობაში დაბრუნება. იქედან გამომდინარე, რომ ნაქსოვი, ხარისხიანი ქუდების ქართული ბრენდი ბაზარზე არ არსებობდა, გადავწყვიტე კომპანიის შექმნა და იმ ბებიების დასაქმება, რომელთაც საზოგადოებაში ინტეგრაცია ყველაზე მეტად სჭირდებათ.
რა მიზნით დაარსდა ის?
ზოგადად, ხანშიშესული ქალბატონების უმრავლესობა საკუთარი თავის რეალიზებას ვეღარ ახდენს, არადა ხელსაქმე – ქსოვა მრავალმა მათგანმა იცის. გარდა ამისა, ბევრი ბებიაა, რომელსაც ფინანსურად ძალიან უჭირს ან მარტო ცხოვრობს. შესაბამისად, გამიჩნდა იდეა, საქართველოში „ბებიას“ პროექტს სოციალური სახე ჰქონოდა, რისთვისაც ბებიების დასასაქმებლად “კათარზისს” მივმართე. ამის შემდგომ პროექტში ოცამდე ბებია ჩაერთო “კათარზისიდან” და არამარტო.
ჩვენი მეორე და ასევე მნიშვნელოვანი მიზანი ეკოლოგიურ პრობლემებზე ზრუნვაა. მსოფლიოში ტანსაცმელში გამოყენებული ქსოვილების 60%-ზე მეტი სინთეტიკურია და ეს გარემოსთვის, ნავთობის პროდუქტების შემდეგ, დაბინძურების ყველაზე დიდ წყაროს წარმოადგენს. სწორედ ამის გათვალისწინებით გადავწყვიტე, ქუდები მოგვექსოვა სპეციალურად ჩვენი საწარმოსთვის დამზადებული 100%-ით ნატურალური თუშური შალით. ხოლო იმისთვის, რომ ქუდები არ ყოფილიყო მოსახმარად უხეში, შიგნიდან ჩაგვექსოვა ბამბის რბილი სარჩული.
შესაბამისად, ჩვენ არ ვართ რიგითი კომპანია, რომელიც უბრალოდ ნაქსოვ პროდუქციას ყიდის. ჩვენი მიზანია, ძვირფასი, ხარისხიანი ნივთის შექმნას მქსოველისთვისაც და მომხმარებლისთვისაც მოჰქონდეს მატერიალური და არამატერიალური სარგებელი.
ამ ეტაპზე, ბევრი ადამიანია ჩართული საქმიანობაში?
ამ ეტაპზე, პანდემიის პირობებში, ჩვენს ქუდებს რეგულარულად ათამდე ბებია ქსოვს. მიუხედავად კრიზისისა, ჩვენი ბებიები მთელი წლის განმავლობაში ქსოვდნენ და სეზონს უკვე გამზადებული საკმაოდ დიდი მარაგით შევხვდით. შემდეგი სეზონისთვის ვფიქრობთ, გავაფართოოთ როგორც ქუდების წარმოება, ასევე – პროდუქციის ასორტიმენტი და მოვქსოვოთ სხვა აქსესუარებიც, როგორიცაა წინდები, ხელთათმანები, შარფები. ეს საშუალებას მოგვცემს, დავასაქმოთ უფრო მეტი ბებია და გავუჩინოთ მათ დამატებითი შემოსავალი.
დღემდე რა შედეგებზე შეგიძლიათ საუბარი – გაამართლა იდეამ?
მიუხედავად იმისა, რომ გაყიდვების ჯერ მხოლოდ ორი წელი გვქონდა, ვფიქრობ, იდეამ უკვე გაამართლა. გაამართლა თუნდაც მხოლოდ იმიტომ, რომ რამდენიმე ბებიას მაინც გავუჩინეთ ახალი საქმე, ახალი ხალისი და შემართება, ერთი სიტყვით, ღიმილი მოვგვარეთ და ვაგრძნობინეთ, რომ საზოგადოებისთვის კვლავ შეუძლიათ ღირებული საქმის კეთება. ისინი ბედნიერები არიან, რომ ისევ შეუძლიათ, გამოიმუშაონ შემოსავალი, რომელიც არცთუ ისე მწირია, თანაც საყვარელი ხელსაქმით და არა – მძიმე შრომით.
იდეამ გაამართლა იმ კუთხითაც, რომ ჩვენს ქუდებს ირგებს თითქმის ყველა ასაკის მომხმარებელი, დაწყებული ჩვილებიდან, დამთავრებული უფროსი თაობის წარმომადგენლებით. ხალხმა გაიცნო ჩვენი ბრენდი, მოსწონს და ვიღებთ ძალიან თბილ უკუკავშირს მათგან. აღმოვაჩინეთ, რომ დიდი პოტენციალი აქვს ბრენდს, პროდუქტს, რამაც გაგვიორმაგა მოტივაცია, რომ გავაგრძელოთ და გავაუმჯობესოთ ეს საქმე.
ვფიქრობ, ეს ყველაფერი უკვე ღირდა ამად.
მასალა მოამზადა : მარიამ ტიელიძემ
