ჯანდაცვის მინისტრ ეკატერინე ტიკარაძის განცხადებით, Pfizer-ი გამოიკვეთა, როგორც ყველაზე ტრენდული ვაქცინა – ამის შესახებ მან ოზურგეთში საგანგებო სიტუაციების კოორდინაციისა და გადაუდებელი დახმარების ცენტრის ახალი შენობის გახნის შემდეგ ჟურნალისტის კითხვის საპასუხოდ განაცხადა.
„Pfizer-ი გამოიკვეთა, როგორც ყველაზე ტრენდული ვაქცინა. როგორც მსოფლიო ჯანდაცვის ორგანიზაცია და მკაცრი მარეგულირებლები აჟღერებენ – ყველა ვაქცინა ერთნაირად მაღალი სარგებლისმომტანია და მათი მხრიდან მოტანილი ზიანი ბევრად უფრო დაბალია, ვიდრე ვაქცინაციაზე უარის თქმა. დარწმუნებული ვარ, საქართველოში სამწუხარო და უბედური შემთხვევების განვითარების შემდეგ ყველა კითხვას გაეცემა პასუხი. ის ღრმა კვლევა, რომელიც დღეს ლევან სამხარაულის სახელობის ექსპერტიზასთან ერთად მიმდინარეობს, მოგვცემს იმის საშუალებას, ვაცნობოთ მოქალაქეებს, რომ ამ უბედური შემთხვევის გამომწვევი მიზეზი ვაქცინა არ ყოფილა. ამის შემდეგ ჩვენი მოქალაქეების ნდობა AstraZeneca-ს მიმართ გაიზრდება და ვაქცინაციის პროცესი ჩვეულ რიტმში აღდგება“, – განაცხადა ეკატერინე ტიკარაძემ.
